කුලගෙදර ගිනිවද්දන ග්‍රහදොස්…

විවාහයට විශේෂයෙන්ම බලපෑම් ඇතිකරන භෞම දෝෂය කුමක්ද යන්න මේ සටහනින් අපි විමසා බලමු. භෞම දෝෂය නම් කුජ (අඟහරු) ගෙන් සෑදෙන යෝගය වේ. අඟහරු ස්ත්‍රී පුරුෂ කේන්දරවල යෙදී සිටින ආකාරය අනුව එකී දෝෂය යෙදීමට ඉඩ ඇත. පොරොන්දම්වලටත් වඩා මේ භෞම දෝෂය තිබේදැයි මුලින්ම බැලිය යුතුය.
විවාහයකට මුලින්ම පරීක්ෂා කර බැලිය යුත්තේ දෙදෙනාගේම ජීවිත බලය ගැනයි. දෙවැනුව අඟහරුගේ යෙදීමයි. තුන්වැනිව පාපාංශක හා අත්‍යාවශ්‍ය පොරොන්දම් ගැළපීමයි.

එහිදී කුජගේ දෝෂය යෙදෙන අයුරු පිරික්සීම අනිවාර්ය වේ. ස්ත්‍රී කේන්දරයක කුජ සිටීම පුරුෂයාට අයහපත් යැයි එක්තරා සම්මතයකි. එමෙන්ම පුරුෂ කේන්දරයක එකී රාශිවලට කුජ සිටීම ස්ත්‍රියට හානිදායක යැයිද සම්මතයකි. සමහර විට වැන්දඹු යෝගයක් යැයිද පිළිගැනේ.

එහෙත් කේන්දර දෙකේම අඟහරු එකී රාශිවල සිටී නම් එම දෝෂය බිඳී යයි. අඟහරු කේන්දර දෙකේම එකම රාශියක පිහිටියේ නම් වඩාත් ගැළපේ. තවද එක කේන්දරයක අඟහරු සිට අනෙක් කේන්දරයේ රවි හෝ රාහු සිටීමෙන් කුජගේ භෞම දෝෂය බිඳීයයි.

තවද සඳුගෙන් 1,2,4,7,8,12 යන භාවයන්හි අඟහරු සිටීමත් භෞම දෝෂයකි. සිකුරුගෙන් එකී භාවයන්හි කුජ සිටීමෙන්ද මෙම භෞම දෝෂය යෙදේ. කේන්දර දෙකේම එකී තැන්වල අඟහරු සිටීමෙන් දෝෂය භංග වේ.

ගුරුගේ පෙනීම 7 වැන්නට හෝ අඟහරුට වැටීමෙන්ම භෞම දෝෂය බිඳේ. කුජ සමග ගුරු එක්ව ඇත්නම් දෝෂය භංග වේ. එක් කේන්දරයක කුජ සිට අනෙක් කේන්දරයේ රාහු වෙතොත් දෝෂය බිඳේ. ස්ත්‍රී පුරුෂ දෙකේම එකම රැසක කුජ සිටීමෙන්ද භෞම දෝෂය භාංග වේ.

කුජගේ මේ දෝෂය වෛධවන් යෝගය නමින් දැක්වේ. මෙවැන්නක් යෙදුණු විට ලෙඩ රෝග ඇතිවීම, වෙන්වීම, කලහකාරී වීම හා විවාහයට අහිතකර තත්ත්වයන් උදාවීම සිදුවේ. තවද විවාහ පමා වේ.

ස්ත්‍රී කේන්දරයේ ලග්නයේත් සඳුගෙන් හා සිකුරුගෙන් 7 සහ 8 පාපීන් සිටීමත් ශුක්‍රගෙන් පීඩාවීමත් වෛධවන් දෝෂයකි.

පිරිමි කේන්දරයේ නම් ලග්න චන්ද්‍ර හා සිකුරු කෙරෙන් 2,7 පාපීන් සිටීමත් සිකුරු පීඩාවීමත් වෛධවන් දෝෂයකි.

ග්‍රහයකු පීඩා වන්නේ නීච ශුක්‍ර රාශිගත ග්‍රහයන්ගේ (පාපී ග්‍රහයන්ගේ) සංයෝගයට පත්වීමෙන් හා දෝෂයට ලක්වීමෙනි.

විවාහ දෝෂ 20ක් ඇත. මෙකී දෝෂ ගැන පොරොන්දම් ගැළපීම්වලදී මුලින්ම බැලීම අනිවාර්ය වේ. විවාහයකට කේන්දර දෙකක් පරීක්ෂා කිරීමේදී පොරොන්දම්වලට අමතරව පරීක්ෂා කර බැලිය යුතු දෝෂ විශාල සංඛ්‍යාවක් තිබේ. එවැනි දෝෂ වැඩිපුර යෙදී තිබේ නම් පොරොන්දම් ගැළපීම ඇතත් සාර්ථක විවාහයකට හිතකර නොවේ. දෝෂ නැති කේන්දර හිඟය. ඒ නිසා සෑම විවාහයක්ම කිරීමේදී විවාහ දෝෂයන් බිඳීයන යෝගයන්ද, ග්‍රහ යෙදීම්ද ඇත. මුලින්ම කළ යුත්තේ දෝෂ ඇති විට ඒවායේ එකී දෝෂ බිඳී යන්නේ දැයි මනාව පිරික්සා බැලීමයි.

මේ අනුව පැහැදිලි වන්නේ විවාහයකදී දෙදෙනාගේම ගැළපීම් තිබේදැයි ගැඹුරින් පරීක්ෂා කර බැලීමයි. සාම්ප්‍රදායික විසි පොරොන්දම් ලකුණු මත විවාහයකට තීරණය කිරීම එතරම් සාර්ථක වන කරුණක් නොවනු ඇත.

ප්‍රවීණ ජ්‍යොතිෂවේදී දේශබන්දු ටී.හෙන්රි බෙම්මුල්ල