මෙලොව උපත ලත් සෑම කෙනකුම ධනය, මිල මුදල්, ඉඩකඩම්, දේපොළ ලැබීමට රුචියක් දැක්වීම ස්වභාවිකයි. ධනය උපයාගැනීම ජීවිතය පවත්වාගෙන යෑමට උපකාරක වන්නේය. තමාගේ නෑයන් මධ්‍යයේ වස්තුව දේපොළ සම්පත් නැතිව වාසය කිරීමට වඩා ව්‍යාඝ්‍ර, සිංහ ආදීන්ගෙන් ගහන වූ මහා වනාන්තරයකට වැදී ගස්ගෙඩි කමින් ගස් පට්ට ඇඳ තණකොළ මත නිදාගැනීම අගනේ යැයි “ප්‍රත්‍ය ශතකයේ” කියැවෙයි. දේපොළ, පාරම්පරික සම්පත්, ඉඩකඩම් නැතිව යන අන්දම ජන්ම පත්‍රයේ ග්‍රහ හැසිරීම් රටාව අනුව හඳුන්වාදී තිබේ.
12 අධිපති 5 අධිපති ස්ථාන දෙකෙහි පරිවර්තනය වෙමින් යෙදීමෙන්ද එලෙසම 4 අධිපති යෙදුණු විට යසඉසුරු දේපොළ සම්පත් වහා විනාශ වේ.
නිසග පාපීන් ගෝචරව යෙදීමෙන් විශේෂයෙන් 9 අධිපති 10 අධිපති ස්ථානගත නොවී සිටියහොත් මාරක ග්‍රහයන් ලග්නයේ යුක්ත වීමෙන් හෝ දැකීමෙන් සම්පත් වැනසේ.
9 අධිපති 12 අධිපති නවයෙහි යෙදීමෙන් උපත ලත් කල ඒ ඒ ග්‍රහයන්ගේ දශා කාලයේදී සම්පත් සියල්ල විනාශ වන්නේය.
11 අධිපති එසේම හයෙහි හෝ අටෙහි සිටීමෙන් 3 හා 7 රාශි එකිනෙකට පරිවර්තනය වීමෙන්ද උපතින්ම ධනවතකුව සිටියද ග්‍රහ දශාවන්හි සියලු දේපොළ විනාශ වේ.
10 අධිපති හයෙහි සිටීමෙන් 11 අධිපති සතුරු රාශියක සිට 11හි 2හි පාපීන් වීමෙන් හා දැකීමෙන්ද යස ඉසුරු සම්පත් විනාශ වේ.
දෙක අධිපති දොළහේ පාපීන් සමග යෙදීමෙන්ද උපන් තැන්හි සිට ජීවිතය ආරක්ෂා කරන්නේ අනුන්ට අතපාමින්ය. යාචකයෙක් වේ.
6,8,12 යෙදීමෙන් 5,9 අංශකවල අධිපතියන් දුටු විට හෝ යුක්ත වූ විට දුකට පත්වේ. සැප සම්පත් දේපොළ නැතිවේ.
1 අධිපති 12 හෝ 12 අධිපති 1 හෝ මාරක ග්‍රහයන් දුටු විට සම්පත් නැතිවේ. දේපොළ අහිමි වේ. ලග්නයේ සඳු, කේතු සිට 5 අධිපති 8හි සිටීමෙන් මාරක දැක්මෙන් යුක්ත වී නම් දුප්පත් වේ. සම්පත් නැතිවේ.
5 අධිපති පාපීන් සමග 6,8,12හි සිටි විට මාරක අධිපති සමග වූවොත් හෝ දුටු විටදීද සියලු යස ඉසුරු විනාශ වේ. දුකට පත්වේ. දේපොළ සදහටම නැතිවේ.
4 අධිපති 6,8,12 දුෂ්ට තැන්වල ශුභ ග්‍රහයන් නැතිව පාපීන් යුක්ත වූ විටදී ලැබුණු සියලු ධනය සම්පත් දේපොළ මිල මුදල් වහා විනාශයට පත්වේ.
ශුක්‍ර හෝ ශනි මේෂයේත්, රවි වෘෂභයේත්, සඳු මීනයේත්, කුජ කටකයේත් සිටීමෙන් උපත ලත් විටදී කෘත නමැති යෝගයෙන් ඉපදී සම්පත් විනාශ වී යයි.
සඳු, රවි දෙදෙනා කුම්භ රාශියේ සිට ගුරු, කුජ, ශුක්‍ර,ශනි නීචවී සිටියද උපත ලැබීමෙන් සම්පත් නැති දිළින්දකු වේ.
9,10,11 අධිපතීන් විකලව නීචවී සිට උපත ලැබීමෙන්ද රාජ යෝග උදා වුවත් සියලු සම්පත් විනාශවී යනු ඇත.
භද්‍රා නම් තිථිය ඇති කුල හෝ ව්‍යාතිපාත යෝගය හෙවත් මහෝත්පාත ඇතිකල හෝ කේතු උදාවූ කල යමෙක් ඉපදීමෙන් රාජ යෝග ඵලයන්ද විනාශ වී යයි.
දෙවැන්නාධිපති හෝ ධන යෝගකාරකීය ග්‍රහයා ත්‍රිකෝණාධිපතීන් සමග එක්ව 6,8,12 යන ස්ථානාධිපතීන් සමග වීමෙන් දුකට පත්වී සැප සම්පත් දේපොළ වහා විනාශ වේ.
අට අධිපතියා ලග්නයේද, ලග්නාධිපතියා මාරක ග්‍රහයකු සමග අටේ සිටීමෙන්ද සම්පත් අහිමිවී දිළින්දකු වේ.
6 අධිපතියා ලග්නයේද ලග්නාධිපතියා හයේද සිට මාරකාධිපතියා දකිනු ලැබීමෙන් හෝ එකතු වීමෙන් සම්පත් නැති අයකු වේ.
චන්ද්‍රයා හිරු දෙදෙනාම ලග්නයේ සිටියදී ලග්නාධිපතියා අටේ මාරක ග්‍රහයා සමග සිටීමෙන් හෝ දැකීමෙන්ද සම්පත් අහිමි දිළින්දකු වන්නේය.
ලග්නාධිපතියා මාරකාධිපතියා සමග අස්තව හෝ සතුරු රාශියක හෝ නීචව හෝ 6,8,12 යන මින් යම් රැසක සිටියහොත් එකලදී එසේම ලග්නාධිපතියා මාරකස්ථානාධිපතියා සමග යුක්ත වූ කල නවය අධිපතියා ශුභයන් නොදැකීමෙන්ද යස ඉසුරු සම්පත් ඇති තැනක උපන්නත් වහා දුකට පත්වී ධනය සම්පත් විනාශයට පත්වේ. ධනය පිරිහෙන විවිධ ග්‍රහ හැසිරීම් රටාවන් අධිකය. මෙහි දක්වා ඇත්තේ ස්වල්පයකි.
ප්‍රවීණ ජ්‍යොතිෂවේදී දේශබන්දු ටී.හෙන්රි බෙම්මුල්ල
