සෙලාන් බැංකුව ඩිජිටල් සේවාවන් සඳහා ජනතාව දිරිගන්වයි

පවත්නා අභියෝගාත්මක තත්ත්වය හමුවේ ජනතාවට අඛණ්ඩව බැංකුකරණ පහසුව පිරිනැමීමට සෙලාන් බැංකුව පෙරමුණ ගෙන සිටී.

මෙම කාලය තුළ නිවසින් පිටතට ගමන් කිරීමේ අපහසුතාව නිසා බැංකුකරණ කටයුතු ඉටුකර ගැනීමට නොහැකිව සිටින පාරිභෝගික ජනතාව වෙනුවෙන් සෙලාන් බැංකුව සිය ජංගම ATM සේවාව, බහු මාධ්‍ය පාරිභෝගික උපකාර ක්ෂණික ඇමතුම් අංක, අන්තර්ජාල සහ ජංගම බැංකුකරණ පහසුකම් තවදුරටත් සවිබල ගන්වා ඇත.

ගෝලීය වශයෙන් සෞඛ්‍ය වසංගතයක් පවතින මෙවැනි අවස්ථාවක ශීඝ්‍රයෙන් වර්ධනයවන ආර්ථික අවිනිශ්චිතතාව හේතුවෙන්, ඩිජිටල් බැංකුකරණ පහසුකම්වලට යොමු වීම සඳහා පාරිභෝගිකයන් දක්වන උනන්දුව මැනවින් අවබෝධ කර ගනිමින් සෙලාන් බැංකුව, www.seylan.lk වෙබ් අඩවියේ ඇති සිය අන්තර්ජාල බැංකුකරණ සේවාව හරහා අන්තර්ජාල මුදල් හුවමාරු, අන්තර්ජාල උපයෝගිතා බිල්පත් පියවීම්, අන්තර්ජාල ගැනුම් ඇතුළු තවත් සේවා රැසක් පිරිනැමීමට කටයුතු කර ඇත. මෙම වසංගත තත්ත්වය පාලනය කිරීම සඳහා දියත් කෙරෙන ජාතික ක්‍රියාන්විතයට සහයෝගය ලබා දීමේ අරමුණින්, බාධාවකින් තොර බැංකුකරණ සහ මුල්‍ය සේවා ලබා දීම සඳහා සිය ඩිජිටල් නවෝත්පාදන කටයුතු තවදුරටත් වේගවත් කරන බවටද සෙලාන් බැංකුව ප්‍රතිඥා දෙයි.