ළමා ලෝකය සැබැවින්ම සුන්දරය. ඒ සුන්දරත්වය තව තවත් ඉහළ නංවන්නේ ඔවුන් විඳින සතුට හා නිදහසයි. එහෙත් අවාසනාවට කරුණ නම් සතුට හා නිදහස අවැසි එවන් දරුවන් රැසක් අද වන විට දුප්පත්කම හමුවේ අධ්‍යාපනය හැර දමා විවිධ රැකියාවන් වෙත යොමුවීමේ දැඩි අවදානමකට ලක්ව තිබීමයි. ආර්ථික අපහසුතා හමුවේ අධ්‍යාපනය අතරමඟ හැර නොයමින් සතුට හා නිදහස රිසි සේ අත්විඳීමේ අවස්ථාව මැලිබන් ගෝල්ඩ් මාරි ‘නිදහසේ රන් දරුවෝ’ ඔවුන් වෙත උරුම කර දීමට කැපවී සිටින්නේ එහෙයිනි. මැලිබන් ගෝල්ඩ් මාරි ‘නිදහසේ රන් දරුවෝ’ අරමුදල, කම්කරු දෙපාර්තමේන්තුව සමඟ එක් වෙමින් ශ්‍රී ලංකාව පුරා ක්‍රියාත්මක කර ඇති සුවිසල් වැඩසටහනෙහි එක් පියවරක් ලෙස දකුණු පළාතේ අඩු ආදායම් ලාභී පවුල් 4ක දරුවන් සිව් දෙනකුගේ අනාගත අභිවෘද්ධිය වෙනුවෙන් අවැසි මූල්‍ය පහසුකම් ලබාදීමට පසුගියදා කටයුතු කරනු ලැබුවේ ඒ අනුවය.
මාතර නගරයේදී පැවති එම උත්සවයේදී දරුවන්ගේ නිදහස අරුත්ගන්වමින් ඔවුන්ගේ අනාගත අභිවෘද්ධිය වෙනුවෙන් මූල්‍ය පහසුකම් සලසා දීමට මැලිබන් ‘නිදහසේ රන් දරුවෝ’ කටයුතු කරනු ලැබීය. එමෙන්ම ඔවුන් තව දුරටත් විවිධ රැකියාවන්හි නිරත වීම වළක්වාලීම වෙනුවෙන් පවුලේ ආර්ථික දියුණුවට අවශ්‍ය මඟ විවර කර දෙමින් මහන මැෂින් 3ක් හා ධීවර කටයුතු සඳහා අවශ්‍ය පහසුකම් සහිත පා පැදියක් එම පවුල් වෙත ප්‍රදානය කිරීමටද කටයුතු කරනු ලැබීය.
