2022 පළමු කාර්තුවේදී රුපියල් බිලියන 7.4ක ඒකාබද්ධ බදු පසු ලාභයක් වාර්තා කරයි.
2022 මාර්තු 31 වැනි දින වන විට ඒකල බැංකු පදනම මත ක්ෂේත්‍රයේ ඉහළම ප්‍රාග්ධන ප්‍රමාණාත්මතා අනුපාත වන 15.7% සහ සමූහ පදනම මත 16.1%ක් පවත්වාගෙන යාමට සමත් වෙයි.
ඒකාබද්ධ වත්කම්, තැන්පතු සහ ගනුදෙනුකරුවන්ගේ අත්තිකාරම් 10.6%, 6.2% සහ 1.1% ලෙස ඉහළ යමින් පිළිවෙළින් රුපියල් ටි්‍රලියන 3.1, ටි්‍රලියන 2.3 හා ටි්‍රලියන 2.0 දක්වා වර්ධනය වෙයි.
ඉහළ යන උද්ධමන තත්ත්වය තුළ පවා සමස්ත මෙහෙයුම් වියදම 2021 වසරේ පළමු කාර්තුව හා සමාන මට්ටමක පවත්වාගෙන යයි.
2021 පළමු කාර්තුව අවසානයේ වාර්තා වූ 64.0% හා සැසඳීමේදී සමස්ත ගනුදෙනුවලින් 70.0%කට වැඩි ප්‍රමාණයක් ඩිජිටල් තාක්ෂණය ඔස්සේ සිදුකරමින් බැංකුවේ ඩිජිටල් සේවාවන් තව දුරටත් ශක්තිමත් කරයි.
මහජන බැංකුව, සිය ඒකාබද්ධ සමස්ත මෙහෙයුම් ආදායම 51.9%ක වර්ධනයක් සමග රුපියල් බිලියන 42.6ක අගයක් වාර්තා කරමින් 2022 මාර්තු 31න් අවසන් වූ වසරේ පළමු කාර්තුවේ මූල්‍ය ප්‍රතිඵල ප්‍රකාශයට පත් කරන ලදී. පවතින උද්ධමනකාරී තත්ත්වය හමුවේ වුවද එහි සමස්ත මෙහෙයුම් වියදම් රුපියල් බිලියන 13.1ක් වූ අතර, එය 0.3%ක පමණ සුළු වර්ධනයක් විය.
ඒ තුළින් අඛණ්ඩ පදනමක් මත සිදුකරනු ලබන මහජන බැංකුවේ යහපත් පිරිවැය කළමනාකරණයේ හා කාර්යක්ෂමතාවයේ වර්ධනය මනාව පිළිබිඹු වේ. එම කාර්තුව තුළ මහජන බැංකුව වාර්තා කරන ලද ඒකාබද්ධ බදු පෙර ලාභය රුපියල් බිලියන 11.0ක් වූ අතර, එය 2021 වසරේ එම කාලය හා සැසඳීමේදී 9.8%ක වර්ධනයක් ලෙස දැක්විය හැකිය.
2022 පළමු කාර්තුව තුළ සමූහයේ සමස්ත මෙහෙයුම් ආදායමෙන් 71.4%ක් හෙවත් රුපියල් බිලියන 30.4ක් ශුද්ධ පොලී ආදායම් වූ අතර, එය පෙර වසරේ අදාළ කාලයට සාපේක්ෂව 29.2%කින් ඉහළ යාමක් ලෙස වාර්තා විය. එහි වත්කම් වර්ධනය හා ශුද්ධ පොලී ආන්තිකය 2021 පළමු කාර්තුවේ වාර්තා කළ 3.6% සිට 4.1% දක්වා වර්ධනයක් පිළිබිඹු කරන ලදි.
පසුගිය කාලය තුළ සිදු වූ රුපියල අවප්‍රමාණය වීමේ ප්‍රතිඵලයක් ලෙස එම කාල පරිච්ඡේදය තුළ හඳුනාගනු ලැබූ රුපියල් බිලියන 3.4ක විදේශ විනිමය ශුද්ධ ලාභය හැරුණු විට වෙනත් ආදායම් මාර්ග වැඩි දියුණු කිරීමේ උත්සාහයන් පිළිඹිබු කරමින් 2021 පළමු කාර්තුව තුළ වාර්තා වූ 13.0%ට සාපේක්ෂව 20.0%කට වැඩි පොලී මත පදනම් නොවන ආදායමක් වාර්තා කිරීමටද මහජන බැංකුව සමත් විය.
