රාජ්‍ය ආයතනවල කිසිදු උත්සවයක් සංවිධාන නොකරන ලෙස චක්‍රලේඛ නිකුත් කොට තිබියදීත් ඒ සියලු නියෝග කඩකරමින් පුරාවිද්‍යා දෙපාර්තමේන්තුවේ පවත්වා ඇති දානමය පිංකම් උත්සවයකට සහභාගී වූ හිමිනමකට කොරෝනා රෝගය වැළදී ඇති බව දැනගන්නට තිබේ.
අමාත්‍යංශ අතිරේක ලේකම්වරයකුගේ පියා වෙනුවෙන් මෙම දානමය පිංකම පසුගිය 9 වැනිදා පවත්වා ඇති අතර සියලු දෙනාටම සහභාගී වන ලෙස දැනුම් දී තිබීම හේතුවෙන් විශාල පිරිසක් ඊට සහභාගී වී ඇති බවද දැනගන්නට ඇත.
ඊට පුරාවිද්‍යා අධ්‍යක්ෂ ජනරාල්, අමාත්‍යංශ අතිරේක ලේකම්වරයා පවා සහභාගී වී සිට ඇති බව වාර්තා වේ.
කෙසේවෙතත් යටකී හිමිනම පුරාවිද්‍යා දෙපාර්තමේන්තුවේම සේවය කරන්නකු වීම හේතුකොටගෙන මේ වනවිට එම දෙපාර්තමේන්තුවේ අංශ 4ක් වසා දමා ඇති බව පැවසේ.
මේ සම්බන්ධයෙන් තොරතුරු වාර්තා වීමත් සමග අමාත්‍ය විදුර වික්‍රමනායක මහතා විසින් මේ වනවිට පරීක්ෂණයක්ද ආරම්භ කොට තිබේ.
