මාතර ගිය රුවන්ලාට පාක්ෂිකයන් හූ තියලා

එක්සත් ජාතික පක්ෂයේ ප්‍රතිසංවිධාන වැඩපිළිවෙළ යටතේ මාතර ප්‍රදේශයට ගිය පක්ෂ නියෝජ්‍ය නායක රුවන් විජයවර්ධන මහතා ඇතුලු පිරිසකට පාක්ෂිකයන් විසින් හූ තබා ඇති සිදුවීමක් වාර්තා වේ.

මාතර නූපේ ප්‍රදේශයේ පැවැති මෙම රැස්වීමට පැමිණෙන ලෙසට ආසන හතේම පාක්ෂිකයන්ට ආරාධනා කර තිබූ නමුත් ඊට සහභාගීව සිටියේ 100කටත් අඩු පිරිසක් බව දැනගන්නට තිබේ.

මෙහිදී ආණ්ඩුවේ කටයුතු විවේචනය කරනවා වෙනුවට සමගි ජන බලවේගයේ නායක සජිත් ප්‍රේමදාස මහතා විවේචනය කිරීමට රුවන් විජයවර්ධන මහතා ඇතුලු පිරිස කටයුතු කිරීමත් සමග පාක්ෂිකයන් නොසන්සුන් වී කෑ කෝ ගසමින් හූ තබා ඇති බව දැනගන්නට ඇත.

පාර්ශව දෙකම ඒකාබද්ධ වී කටයුතු කළ යුතු බවද එහිදී පාක්ෂිකයන් පෙන්වා දී ඇති බව පැවසේ.

මීට අමතරව වැලිගම නගරාධිපතිවරයා වන රෙහාන් ජයවික්‍රම මහතා එම තනතුරින් ඉවත් කළ යුතු බවට ඇතමුන් යෝජනා කරද්දී ඊටද පාක්ෂිකයන් විරෝධය පළ කොට ඇති බව වාර්තා වේ.

මෙම අවස්ථාවට පක්ෂ මහලේකම් පාලිත රංගේ බණ්ඩාර මහතා, ශාන්තිනී කෝන්ගහගේ මහත්මිය ඇතුලු පිරිසක්ද සහභාගී වී සිට ඇති බව දැනගන්නට ඇත.