විජේවීරගේ පුතා පළමු වෙඩිමුරය පත්තු කරයි (PHOTOS)

1971 කැරුල්ලට වසර 50ක් සපිරෙන මොහොතේ ජනතා විමුක්ති පෙරමුණේ නායක රෝහණ විජේවීර මහතාගේ පුත් උවිදු විජේවීර මහතා අලුත් ගමනක් ආරම්භ කිරීමට පියවර ගෙන ඇත.

ඒ, 71 කැරැල්ලට පණ පෙවූ සාමාජිකයන් සොයා යාමය.

ඒ සම්බන්ධයෙන් උවිදු සිය ෆේස්බුක් පිටුවේ තබා තිබූ සටහන මෙසේය.

‘අධිරාජ්‍යවාදයට හා ම්ලේච්ඡ ධනවාදයට විරුද්ධව සමානාත්මතාව වෙනුවෙන් කරන සටනේදී නාමික ප්‍රජාතන්ත්‍රවාදී මාවත වෙනුවට විප්ලවීය මාවත යොදාගෙන දියත් කල සන්නද්ධ අරගලයට වසර 50ක් පිරීමට ඇත්තේ තවත් දින කිහිපයකි.

ආත්මාර්ථය වෙනුවෙන් ජීවත්වන තාරුණ්‍යට වඩා, 80% වඩා සිටින වැඩකරන පීඩිත පංතිය වෙනුවෙන් තමන්ගේ තාරුණ්‍යය කැපකරපු, සිපිරිගෙය තාරුණ්‍ය ගත කරපු හා ජීවිත පරිත්‍යාග කරපු 71කේ විරුවන් කොතරම් ශ්‍රේෂ්ඨද?

71කේ සටන් කරපු විරුවන්ගෙන් සමහරක් මෙලොව හැරගොස් අවසන් අතර අනෙක් අය සැඳෑ සමය ගතකරමින් සිටින බව කවුරුත් දන්නවා ඇති. ඔවුන් වෙනුවෙන් කරන්න යුතුකමක් දෙවන පරපුරට ඇත.

* 71 අරගලය වෙනුවෙන් ද එහි විරුවන් අනුස්මරණ උදෙසා වෙබ් පිටුවක් නිර්මාණය කිරීම.

*71 කේ විරුවන්ව ද්‍රෝහීන් කරන විකෘති ඉතිහාසය වෙනුවට යතාර්ථය සමාජයට අවබෝධ කිරීම.

* 71කේ අරගලය නිසා ජීවිත පරිත්‍යාග කල 71කේ විරුවන්ව මෙන්ම ආරක්ෂක අංශයේ හා සිවිල් සමාජයේ ජීවිත අහිමි වූ සියලු දෙනා ගැන දත්ත එක්‍ රැස්කිරීම අනුස්මරණ කිරීම හා ඒ පවුල් වලට උපකාර කිරීම.

* 71කේ විරුවන්ගෙන් කායික, මානසික හා ආර්ථික අඟහිඟකම් වලින් පෙලෙන අයට උපකාර කිරීම.

* මහනඩුවේ සිදුවුන ඇතැම් සිදුවීම් නිසා මේවන තෙක් මුහුණට මුහුණ නොබලන තරම් වෙන්වී සිටින 71 විරුවන් එකතුකිරීම.

* දිනෙක එකම අරමුණක් වෙනුවෙන් වැඩකල විරුවන්ගේ දෙවන පරපුර එකතුවීම.

2021 අප්‍රේල් මස දෙවන පරපුර විසින් ඉහත අරමුණු සාක්ෂාත් කරගැනීමේ පලමු වෙඩිමුරය තබන්නට සූදානම්.

මෙහි පලමු පියවර ලෙස අපි දෙවන පරපුර විදියට 71කේ පැරැන්නන් හමුවීමට ගියා.

W කරුණාරත්න හෙවත් ඉන්කම්ටැක්ස් කරූ, පියසිරි කුලරත්න, ලක්ෂ්මන් චන්ද්‍රසිරි ප්‍රනාන්ද හෙවත් කළු ලකී, ලොකු අතුලගේ බිරිඳ හා ටී ඩී සිල්වාගේ දියණිය වන ධම්මිකා ජයසිංහ, ලොකු අතුලගේ නැගනියන් වන මාලනී හා චන්ද්‍රා, ඔස්මන්ඩ් ද සිල්වා, පැට්‍රික් ප්‍රනාන්දු, පියතිලකගේ පුතා වන කසුන් යන අය හමුවීමට ගියා. (කොළඹ හා ගම්පහ දිස්ත්‍රික්ක තුල සිටින,)

අනෙක් දිස්ත්‍රික්ක තුළ සිටින විරුවන් හමුවීම ට ඉදිරියේදී බලාපොරොත්තු වෙමු.’