Connect with us
Redmi 9C
Advertisement

Exclusive

විපක්ෂයේ බැසිල් භීතිකාව (විමලසිරි ජයලත්ගේ රටේ පැත්ත)

Published

on

“බැසිල් පාර්ලිමේන්තු එනවා….”
“දැනටමත් ආර්ථික සංවර්ධන අමාත්‍ය ධුරය බැසිල්ට දෙන්න ගෝඨා ප්ලෑන් කරලයි තියෙන්නෙ…”
“මේ හදන්නෙ ආපහු 2015ට කලින් තිබ්බ විදහටම රට කරන්න…”
පසුගිය සතියේ විපක්ෂයේත්, විපක්ෂ සමාජ මාධ්‍ය ජාලාවලත් ලොකුම මාතෘකාව වූයේ බැසිල් පාර්ලිමේන්තු එනවා කියන එකය. විපක්ෂය මෙහෙම බැසිල් පාර්ලිමේන්තු එනවා කියලා සෝෂල් මීඩියාවල යකා නැටුවේ අඩුම තරමින් ආණ්ඩුව බැසිල් ගැන වචනයක්වත් කියා නොතිබූ මොහොතකය. ඒ තියා බැසිල්වත් කොහේදීවත් තමන් පාර්ලිමේන්තු එනවා කියා කට හොල්ලා තිබුණේ නැත. අඩුම තරමින් ආණ්ඩුවේ ඇමැතිවරයෙක් හරි මන්ත්‍රිවරයෙක් හරි බැසිල්ගේ පාර්ලිමේන්තු ගමන ගැන වචනයක් හෝ කියා තිබුණේ නැත.
“ඉතින් එහෙම තියෙද්දි ඇයි මේ එකපාරටම විපක්ෂය කඩි ගුලක් වගේ ඇවිස්සිලා බැසිල් ගැන කතා කරන්න ගත්තෙ….”
පසුගිය සතියේ කොළඹ දේශපාලන අංශවල ප්‍රධාන මාතෘකාව වුණේ ඒකය. විශේෂයෙන්ම විපක්ෂය නියෝජනය කරන ප්‍රබලයන් වන හර්ෂද සිල්වා, හරීන් ප්‍රනාන්දු ආදීන් තමන්ගේ ෆේස්බුක් ගිණුම්වලත්, ට්විටර් පණිවුඩවලත් විවිධ සටහන් තබමින් බැසිල් ගහන්න යන අලුත්ම ගේම ගැන විවිධ දේ ලියා තිබිණ.
මේකෙන් එකක් පැහැදිලිය. ඒ බැසිල් පාර්ලිමේන්තු එනවාට විපක්ෂය දැන්ම තියා බය වී ඇති බවය. විපක්ෂයට බැසිල් භීතිකාවක් වැළඳී ඇති බවය.
‘හරි… බැසිල් පාර්ලිමේන්තු එනවා කියමුකො. ඇයි මේ කොරෝනා අස්සෙම බැසිල් පාර්ලිමේන්තු එන්නෙ ඇයි…?’
ප්‍රශ්නෙ තියෙන්නෙ එතැනය.
බැසිල් මේ වෙලාවේ පාර්ලිමේන්තුවේ එනවා නම් ඒකට බලපාන හේතු දෙකක් තිබේ. ඉන් එකක් වන්නේ මේ රටේ ආර්ථිකයය.
මේ වෙද්දි ආණ්ඩුවේ ආර්ථික ප්‍රගති වාර්තාව ඇත්තේ එතරම් සතුටුදායක තත්ත්වයක නොවේ. ආණ්ඩුවට මේ වන තෙක්ම බඩු මිල අඩු කිරීමට හැකියාවක් ලැබී නැත. කොරෝනාවෙන් බැටකන රටේම ජනතාවට සහන දෙන්න හැකියාවක් ලැබී නැත. කොරෝනාව මුල්කරගෙන රටේ ආර්ථිකයද දිනෙන් දිනම පල්ලම් බහින තැනට පත්ව තිබේ. ආණ්ඩුවේ මැති ඇමැතිවරුන්ම ආණ්ඩුවේ ප්‍රධානීන්ට දැනුම් දී ඇත්තේ දැන් තියෙන තත්ත්වය උඩ තමන්ට ගමටවත් යන්නට බැරි වී ඇතැයි කියාය. ගිහිල්ලා ගමේ මිනිස්සු අහන ප්‍රශ්නවලදී දෙන්න උත්තරයක් නැතැයි කියාය.
රාජපක්ෂ පවුලේ මේ ආර්ථික සෙල්ලම හොඳටම දන්නේ වෙන කවුරුවත් නොව බැසිල්ය. ඒකට හොඳම උදාහරණය ආණ්ඩුව පළමු කොරෝනා රැල්ලේදී මුළු රටම ලොක්ඩවුන් කළාම රටේම ඉන්න දුප්පත් මිනිස්සුන්ට රුපියල් 5000ක් ආණ්ඩුවෙන් ලබා දිය යුතු බවට යෝජනාව ගෙනාවේ වෙන කවුරුවත් නොව බැසිල්ය. කොරෝනාව නිසා ජන්දෙ කරන්න ගමට බහින්න බැරිව හිටපු මැති ඇමැතිවරුන් ඡන්ද කාලේ බය නැතිව ගිහින් පාක්ෂිකයන්වත්, ජනතාවත් හමුවෙලා කැම්පේන් එක කළේ බැසිල් ගමේ මිනිස්සුන්ට මේ දුන්නු රුපියල් 5000ට පින් සිද්ධවෙන්නය. මන්ත්‍රිවරුන් ගමේ මිනිස්සු පොහොට්ටුවට ඡන්ද දෙන්න පෙළගැස්සුවේ බැසිල් දුන්න මේ 5000 හයිය අරගෙනය.
අද වගේම එදා 2010 – 2015 ආණ්ඩු කාලයේත් මේ වගේම ආර්ථික අහේනියකට මුහුණදෙන්න මහින්දගේ ආණ්ඩුවට සිදුවිය. 2010 යුද්ධය දිනලා ආණ්ඩුව පිහිටෙව්වත් යුද්ධයට භාණ්ඩාගාරයේ තිබ්බ සල්ලි විශාල ප්‍රමාණයක් යට කළ නිසාත්, ඒ වෙද්දි ලෝක ආර්ථිකය විශාල වශයෙන් අර්බුදකාරී ලෙස කඩාවැටීමට පටන් ගැනීම නිසාත් ලංකාවේ ආර්ථිකය එන්න එන්නම කඩාවැටුණු තත්ත්වයකට පත්වෙමින් තිබිණ. ඒ වෙලාවේ ආණ්ඩුවට විතරක් නෙමෙයි මහින්දටත් තිබ්බ ලොකුම ප්‍රශ්නය වුණේ රටේ ආර්ථිකය මේ විදිහට වැටිල තියෙද්දි 2015 ජනාධිපතිවරණයට මුහුණදෙන්නේ කොහොමද කියන එකය. මේ නිසා රටේ ආර්ථික අර්බුදය වගේම මහින්දගේ හිතේ තිබුණු අර්බුදයත් එන්න එන්නම ඉහළ යන ආකාරයක් දැකගන්නට තිබිණ.
බැසිල් 2014 ජුනි මාසයේ හදිසියේම චීන සංචාරයක නිරත වූයේ මේ සියල්ල අතරවාරයේය. ඒ ගිය බැසිල් චීන උප ජනාධිපතිවරයා මුණගැසී සාකච්ඡා පැවැත්වීමට පියවර ගත්තේය. ඒ සාකච්ඡාවේදී ජනාධිපතිවරණයට කලින් රටේ ජනතාවට සහන දිය හැකි ලෙස ලොකු ණය මුදලක් අනුමත කර ගැනීමට බැසිල් චීන උප ජනාධිපතිවරයා එකඟ කරවා ගත්තේය. 2015 ජනාධිපතිවරණය කටමුල තියා මහින්දගේ ආණ්ඩුව නත්තල් පප්පාට ඇඳ රටේ ජනතාවට සහන දුන්නේ බැසිල් හොයාගෙන ආ මේ චීන සල්ලිවලින්ය. බඩු මිල විතරක් නොව ආණ්ඩුව තෙල් මිලද ඒ කාලයේ පහත දමා ජනතාවට විශාල සහනයක් ලබාදුන්නේ ඒ සල්ලිවලින්ය.

හැබැයි අද තියෙන්නේ ඊටත් වඩා නරන තත්ත්වයකි. මොකද කොරෝනාව ලංකාව පමණක් නොව මේ වන විට ලෝකයත් ගිලගෙන හමාරය. බැසිල් මේ සැරේ පාර්ලිමේන්තු එන්න යන්නේ කොරෝනාවලින් මේ විදිහට රටම විතරක් නෙමෙයි ලෝකයම වෙලාගෙන තියෙද්දීය. විපක්ෂය දැනටමත් බයවී බැසිල්ට ගහන්න පටන් අරන් තියෙන්නේ බැසිල් ගිය සැරේ පාර්ලිමේන්තු ඇවිත් මහින්දව ගොඩ දැම්මා වගේ මේ පාර ඇවිත් ගෝඨාව ගොඩ දාලා දෙයි කියාය. රටේ ආර්ථිකය ගොඩදාලා ජනතාවට සහන දෙයි කියාය. විදෙස් රටවල් සමඟ සාකච්ඡා කොට රටට ණය ආධාර අරන් එයි කියාය. බැසිල් එන්නත් කලින්ම විපක්ෂය මේ විදිහට බැසිල්ට ගහන්න පටන් අරන් තියෙන එකේ රහස ඒකය.
බැසිල් පාර්ලිමේන්තු ඒමේ දෙවැනි කාරණය විපක්ෂය පාර්ලිමේන්තුව ඇතුළේ ඔළුව උස්සන්න පටන් අරන් තිබීමය. ආණ්ඩුවට මේ වන විට තුනෙන් දෙක අති විශේෂ බලයක් තිබුණත් විපක්ෂය මේ දිනවල විවිධ මාතෘකා අල්ලගෙන පාර්ලිමේන්තුව ඇතුළේ ආණ්ඩුවට තඩිබාන ආකාරයක් දැකගන්නට තිබේ. ආණ්ඩුව පැත්තේ විශාල මන්ත්‍රිවරුන් ප්‍රමාණයක් හිටියත් විපක්ෂයේ දේශපාලන තර්කවලට හරියට උත්තර දී ඒවා නිෂ්ක්‍රීය කරන්න ආණ්ඩු පක්ෂයට පාර පෙන්විය හැකි හරිහමන් නායකයෙක් දැනට ආණ්ඩුව ඇතුළේ නැත. විපක්ෂයේ මේ බලය කඩන්න රාජපක්ෂ පවුලෙන් පාර්ලිමේන්තුවේ ඉන්න ඕනා නියම සුදුස්සා වෙන කවුරුවත් නොව බැසිල්ය.
අනෙක් අතට එදා හැමෝම හිතුවේ විස්සට එරෙහිව පාර්ලිමේන්තුව ඇතුළෙනුත්, පාර්ලිමේන්තුවෙන් පිටතත්, ආණ්ඩුව ඇතුළෙනුත්, ආණ්ඩුවට පිටිනුත් ආපු බලපෑම නිසා විස්ස හකුලගන්න වෙයි කියාය. ආණ්ඩුව ඇතුළේම බොහෝ දෙනා විස්සට එරෙහිව ප්‍රසිද්ධියේම මත ප්‍රකාශ කරන්නට පටන්ගත් නිසා විපක්ෂයත් හිටියේ විස්ස පරද්දන්න පුළුවන් කියන ලොකු විශ්වාසයකින්ය.
හැබැයි බැසිල් පාර්ලිමේන්තුවෙන් එළියේ ඉඳන්ම විස්සට ගහපු ගේම නිසා අන්තිම මොහොතේ විපක්ෂය විතරක් නොව ආණ්ඩුව ඇතුළේ විස්සට එරෙහිව සිටි අයටත් යන්නට වුණේ කකුල් දෙකෙන් නොව හොම්බෙන්ය. ඒ නිසා බැසිල් පාර්ලිමේන්තුවට ආවොත් මුස්ලිම් මන්ත්‍රිවරු ආණ්ඩුවට කඩාගෙන ගියා වගේ නොව, ඩයනා ආණ්ඩුවට කඩාගෙන ගියා වගේ නොව තවත් හොඳ හොඳ කෙළි ටිකක් බලාගන්න හැකිවනු ඇති බව විපක්ෂය හොඳහැටි දනී. විපක්ෂය දැන්ම තියා බය බිරාන්ත වී බැසිල්ට ගහන්නට පටන්ගෙන ඇත්තේ ඒ නිසාය. මොකද බැසිල් කියන්නේම විපක්ෂය සුණුවිසුණු කර දැමිය හැකි පරමාණු බෝම්බයකි.
හැබැයි බැසිල් තවම තමන්ගේ පාර්ලිමේන්තු ගමන ගැන එළිපිට වචනයක් නොකීවත් මහින්දත්, ගෝඨාත්, නාමල් ඇතුළු රාජපක්ෂ පවුලේ සියල්ලන්ම බැසිල්ගේ පාර්ලිමේන්තු ගමන කවදා කොහොම සිදුවනවාද යන්න දැනටමත් දැන සිටිනවා විය යුතුය. ඒ නිසා රාපක්ෂ පවුලේ මේ අයත් බලා සිටින්නේ විස්ස සම්මත කරද්දී බැසිල් පාර්ලිමේන්තුව එළියේ සිට පත්තු කරපු ගිනිකෙළි සංදර්ශන පාර්ලිමේන්තුව ඇතුළට ඇවිත් පත්තු කරන තෙක්ය. එදාට විපක්ෂයට පමණක් නොව ආණ්ඩුව ඇතුළේ ඉඳන් කන කන අයටත් දුවන්න අලුත් පාරවල් හොයාගන්න වෙනවා නිසැකය.

විමලසිරි ජයලත්

Advertisement
Exclusive1 month ago

මැරෙන්න කලින් මධූෂ් හෙළි කරපු මහකුඩ්ඩන් හතර දෙනාගේ නම් මෙන්න (VIDEO)

Exclusive1 year ago

මහේෂ්ට ජනපතිවරණයට ආරාධනාවක්

Exclusive1 year ago

සිකුරාදා රෑ කරන්න ගිය ‌මෛත්‍රිගේ අගමැති කුමන්ත්‍රණය කඩා වැටේ

Exclusive1 year ago

මහින්දගෙන් ‌ගෝඨාට නියෝගයක්

Astrology11 months ago

2020 ලග්න පලාපල ඔබට කොහොමද?

Exclusive8 months ago

හිටපු ජනපති පුතා ඇඳිරි නීතිය මැද මහ රෑ දාපු පාටිය ගැන මාධ්‍යවේදිනිය ‌පොලිසියෙන් ප්‍රශ්න කරයි

Mahawanshaya1 year ago

ගම්දනාව බියවද්දමින් උලමා හොයන දේ

Exclusive1 year ago

එජාප ඇමැතිලා 5ක් ඉවතට -අලුත් නම් 5ක් සූදානම්

Astrology12 months ago

ඔබේ සහකරු ඉන්න තැන මෙන්න

Astrology1 year ago

නිවෙසේ උපකරණ සඳහා සුබම දිශාව

Exclusive7 months ago

කෝටිපති දිලිත් කෝටි 2ක් දීලා විශේෂ යානයක් හදිසියේම ඩුබායි යැව්වේ ඇයි? (PHOTOS)

Exclusive7 months ago

අමෙරිකා-බ්‍රිතාන්‍යය-ජර්මන්-යුරෝපා සංගම් තානාපතිවරු පෝලිමේ සජිත් හමුවන්න එති (VIDEO)

Astrology1 year ago

විෂ්ණු දෙවියන්ගේ පිහිට ගෙනන පූජාවක්

Exclusive9 months ago

රනිල්ගේ UNP එකයි සජිත්ගේ UNP එකයි

Exclusive1 year ago

පොතේ හැටියට දිනන්නේ කවුද? (උපුල් ‌ජෝශප් ප්‍රනාන්දුගේ ගුරුදා විග්‍රහය)