ඩොලර් උපයන්න පුළුවන් හොඳම ක්‍රම ගණනාවක් තිබෙන බවත් ඉන් එකක් වන්නේ තොරතුරු තාක්ෂණ ක්ෂේත්‍රයේ අපනයන ප්‍රවර්ධනය කිරීම බවත් විපක්ෂ නායක සජිත් ප්‍රේමදාස මහතා පැවසීය.
රජයේ මුදල් පසුම්බිය අද හිස් බවත්, අද තියෙන්නේ බංකොලොත් ආණ්ඩුවක් සහ බංකොලොත් රටක් බවත් කී විපක්ෂ නායකතුමා ආණ්ඩුව බංකලොත් වුණත් විපක්ෂය රට වෙනුවෙන් කැපවෙන බවද පැවසීය.
රාජපක්ෂ ආණ්ඩුව මේ රට විනාශ කරලා දැන් ඒ වෙනුවට ප්‍රතිචක්‍රීකරණය කරපු ආණ්ඩුවක් බිහි වෙලා තියෙන බව් කී විපක්ෂ නායකතුමා ඔවුන් ඊටත් වඩා අසමත් බව කීය.
දේශයේ දරුවන්ට සුහුරු ලොවක දෑත් ඔසවනු පිණිස විපක්ෂ නායක සජිත් ප්‍රේමදාස මහතා සංකල්පයක් ලෙස ක්‍රියාත්මක “සුහුරු පන්ති කාමර සඳහා පරිගණක තාක්ෂණික පුවරු” සහ නවීන පරිගණක පරිත්‍යාග කරන “සක්වල” වැඩසටහනෙහි 21 වන පියවර ලෙස අද (03) බස්නාහිර පළාතේ අවිස්සාවේල්ල වග ශ්‍රී රතනසාර මහා විද්‍යාලයට රුපියල් අට ලක්ෂ හතලිස් හයදහසක් (රු. 846,000) වටිනා සුහුරු පන්තිකාමර සඳහා ඩිජිටල් පරිගණක තිර සහ පරිගණක උපකරණ එම පාසැලට පරිත්‍යාග කරනු ලැබීය.
“අද රටේ ආහාර ප්‍රශ්නයක් නිර්මාණය වෙලා තියෙන බව කී විපක්ෂ නායකතුමා වගා සංග්‍රාමයක් උදෙසා රටේ ලක්ෂ 220 න්ම ඉල්ලීමක් කරන බවද කීය.ඒ වෙනුවෙන් සමගි ජනබලවේගය ශක්තිය දෙන බවද විපක්ෂ නායකතුමා පැවසීය.
