ප්‍රශ්න කන්දකට සිරවී ඕජස් ගලන තුවාලයක් බවට පත්ව ඇති රට සුවපත් කිරීම උදෙසා සම්ප්‍රදායක වැඩපිළිවෙළක් කිසිසේත් සරිලන්නේ නැතැයි පක්ෂ නායක සජිත් ප්‍රේමදාස මහතා පැවසීය.
මේ වැටී ඇති ආර්ථික ප්‍රපාතයෙන් රටට ගොඩ එන්න පුලුවන්ද යන ප්‍රශ්නයට ඇති සෘජු පිළිතුර වන්නේ “පුළුවන්” යැයි පැවසූ විපක්ෂ නායකතුමා, ඊට අවශ්‍ය වන්නේ වන්නේ තිරසාර අවංක වැඩපිළිවෙළක් බව පැවසීය.
සම්මුතියට නිදහස් අවකාශයක් මැයෙන් “මැදහත් මාවත” සිවිල් සංවිධාන එකමුතුව විසින් සංවිධානය කරනු ලැබූ වැඩසටහනක් ඊයේ (22) පැවැත්විණි. සිවිල් ක්‍රියාකාරීන් විශාල පිරිසකගේ සහභාගිත්වයෙන් පැවති මෙම වැඩසටහනට විපක්ෂ නායක සජිත් ප්‍රේමදාස මහතා ඇතුළු දේශපාලන සමාජ සහ සිවිල් ක්‍රියාකාරීන් රැසක්ම සහභාගි වූහ.
ජනාධිපතිට අගමැතිට පාර්ලිමේන්තුවට හුදකලාවී තනිමතයට රටක් ගොඩනැගිය නොහැකි බවත් විශේෂයෙන්ම ව්‍යවස්ථාදායකය විධායකය සහ අධිකරණය යන කුලුණු තුන සංවරණ හා තුලන ක්‍රමවේදය සහිත ව පැවතිය යුතු බව තමන් විශ්වාස කරන බව විපක්ෂ නායක සජිත් ප්‍රේමදාස මහතා පැවසීය.
සමාජ ප්‍රජාතන්ත්‍රවාදය මත හිඳගෙන මේ රටේ ප්‍රශ්න විසඳිය යුතු යැයි තමන් විශ්වාස කරන බව පැවසූ විපක්ෂ නායකතුමා, ඉතාමත්ම ප්‍රායෝගිකව පොදු වැඩපිළිවෙලක අවශ්‍යතාවය අද වන විට අන් කවරදාටත් වඩා දැඩිව දැනෙමින් තිබෙන බවද පැවසීය. එම පොදු වැඩපිළිවෙළ ප්‍රායෝගික විය යුතු බව පැවසූ විපක්ෂ නායකතුමා, එම පොදු වැඩපිළිවෙළ නිරන්තරයෙන් සාකච්ඡාවට ලක්විය යුතු අවංක එකක් විය යුතු බවද පැවසීය.
අපේ රටේ ආර්ථික වර්ධන වේගයන් පිළිබඳව කෙරෙන කතාබහ ප්‍රායෝගික නොවන බව පැවසූ විපක්ෂ නායකතුමා ආදායම් විෂමතාවය අදහාගත නොහැකි තරම් බරපතළ තත්ත්වයක තිබියදී ඒ විෂමතාවය අමතක කොට ආර්ථික වර්ධන වේගයක් ගැන කතා කිරීම විහිළුවක් බව ද පැවසීය.
මෙවැනි ව්‍යසනකාරී වූ වකවානුවක දී රාජ්‍ය තාන්ත්‍රික මැදිහත්වීමේ අවශ්‍යතාවය අවධාරණය කළ විපක්ෂ නායකතුමා පවසා සිටියේ, මෙහිදී ලංකාවෙන් පත්කොට ලවා ඇති තානාපතිවරුන්ට පැවරී ඇති වගකීම අතිමහත් බව ය. අවාසනාවට බහුතරයක් තානාපතිවරු එය අවබෝධ කොටගෙන නැති බව පැවසූ විපක්ෂ නායකතුමා එය බලවත් කනගාටුවට කරුණක් බව ද පැවසීය.
රට ගොඩනගන වැඩපිළිවෙළේ ප්‍රධාන කුළුණු පහ අතරට සිවිල් සංවිධාන ද අයත් විය යුතු බව පැවසූ විපක්ෂ නායකතුමා යහපත් සහ ප්‍රශස්ත රාජ්‍ය පාලනයක් උදෙසා එය අත්‍යවශ්‍ය බව ද කීය .
