බණ්ඩාරගම ප්‍රාදේශීය සභාවේ සභාපතිවරයා අද දින පොහොට්ටුවේ මන්ත්‍රීවරුන් සමග සභාව අතහැර පලා ගිය බවත්, ඒ හේතුවෙන් සභාවේ මන්ත්‍රීතුමන්ලාගේ යෝජනා ස්ථීරත්වයෙන් වැඩ බලන සභාපතිවරයා ලෙස තමන් සභාපති පුටුවේ අසුන් ගත් බවත් එහි විපක්ෂ නායක දර්ශන පීරිස් මහතා පැවසීය.
තමා ඇතුලු විපක්ෂය එළියේ උද්ඝෝෂණයක් සිදු කරද්දී සභාපතිවරයා කෝටි ගණනක මහජන මුදලක් අපතේ යවමින් යෝජනා අසූ හතක් විනාඩි 12 කදී සම්මත කරගෙන තිබුණු බවත් ඒ මහතා කීය.
‘මා ඇතුළු මන්ත්‍රීතුමන්ලා සභාවේ විරෝධතාවය එළිමහනේ පවත්වන අතරවාරයේදීයි සභාපතිවරයා එසේ යෝජනා 87 ක් විනාඩි 12 කදී සම්මත කර තිබුණේ.අප විපක්ෂ මන්ත්‍රීවරුන් සමග අද දින ජනතා විමුක්ති පෙරමුණේ සහ ශ්‍රී ලංකා නිදහස් පක්ෂ මන්ත්‍රීතුමන්ලාත් එක්වී රටේ පවතින දුර්දාන්ත ගෝඨාභය රාජපක්ෂ පවුල් පාලනය අවසන් කරන ලෙස ඉල්ලා සිටියා.’ යැයි ඒ මහතා පෙන්වා දුන්නේය.
