ලංකාවේ තෙල්-ගෑස් එක රැයින් අහස උසට නගිද්දී ඉන්දියාව තෙල්-ගෑස් මිල අඩු කර ජනතාවට සහන දෙයි!

ඉහළ යන උද්ධමනය හේතුවෙන් පීඩාවට පත් ඉන්දියාවේ දිළිඳු සහ මධ්‍යම පංතියේ වැසියන්ට සහන ලබා දීමේ අරමුණින් පෙට්‍රල් ලීටරයක මිල ඉන්දීය රුපියල් 9.5 කින් සහ ඩීසල් ලීටරයක මිල රුපියල් 7 කින් අඩු කරන බව ඉන්දීය මධ්‍යම රජය පවසා ඇත.

තව ද ඉන්දීය අග්‍රාමාත්‍ය නරේන්ද්‍ර මෝදිගේ සංකල්පයකට අනුව දිළිඳු පවුල්වල කාන්තාවන්ට ගෑස් සිලින්ඩර් ලබා දීමේ ‘උජ්වාලා යෝජනා ක්‍රමය’ ආරම්භ කර ඇති බව පැවැසෙයි.

‘උජ්වාලා යෝජනා ක්‍රමය’ යටතේ, ප්‍රතිලාභීන් ට වසරකට ගෑස් සිලින්ඩර් 12 ක් දක්වා ලැබෙනු ඇති අතර, එක් සිලින්ඩරයකට ඉන්දීය රුපියල් 200 ක සහනයක් ලබා දීමට රජය බලාපොරොත්තු වෙයි.

ඒ අනුව, මුම්බායි සහ දිල්ලි නගරවල කිලෝ ග්‍රෑම් 14.2 ක් වූ ගෘහස්ථ ගෑස් සිලින්ඩරයක මිල ඉන්දීය රුපියල් 1,003 ක් වන අතර ‘උජ්වාලා යෝජනා ක්‍රමයේ‘ ප්‍රතිලාභීන්ට ලැබෙන රුපියල් 200 ක සහනයක් යටතේ ඉන්දීය රුපියල් 803 ට ගෑස් සිලින්ඩර හිමි වනු ඇතැයි ඉන්දීය මාධ්‍ය පෙන්වා දෙයි.

ඉන්දීය මුදල් අමාත්‍ය නිර්මලා සීතාරමන් පසුගිය 21 වැනි දා පෙට්‍රල් ලීටරයකට පනවා තිබූ බදු රුපියල් 8 කින් ද ඩීසල් ලීටරයකට පනවා තිබූ බදු රුපියල් 6 කින්ද අඩු කල බව නිවේදනය කර තිබේ.

ඒ හේතුවෙන් පෙට්‍රල් ලීටරයක මිල ඉන්දීය රුපියල් 9.5 කින් ද, ඩීසල් ලීටරයක මිල රුපියල් 7 කින් ද අඩු වනු ඇතැයි පැවසුවාය.
ඒ අනුව, දිල්ලි නගරයේ පෙට්‍රල් ලීටරයක නව මිල ඉන්දීය රුපියල් 96.72 වනු ඇති බවත් ඩීසල් ලීටරයක නව මිල 89.62 වනු ඇතැයි ඉන්දීය මාධ්‍ය වාර්තා කර තිබේ.