දිවයිනේ සියලුම ත්‍රිරෝද රථ නියාමනය කිරීමේ ව්‍යාපෘතියක් ශ්‍රී ලංකා පොලිසිය විසින් ආරම්භ කර ඇත.
මෙම වැඩසටහන යටතේ රියදුරන් සහ හිමිකරුවන් ඇතුළු දිවයිනේ සියලුම ත්‍රිරෝද රථවල තොරතුරු ඔවුන්ගේ ඡායාරූප ඇතුළුව වෙනම වෙබ් අඩවියක ලියාපදිංචි කෙරේ.
මෙම ව්‍යාපෘතියේ නියමු වැඩසටහන බස්නාහිර සහ දකුණු පළාතෙන් ආරම්භ කරන ලදී.
මාතර ජ්‍යෙෂ්ඨ පොලිස් අධිකාරී නිශාන්ත ද සොයිසා මහතාගේ උපදෙස් පරිදි වැලිගම පොලිස් වසමේ ත්‍රිරෝද රථ නියාමනය කිරීමේ වැඩසටහන පෙරේදා (4) ආරම්භ කෙරිණි.
මත්ද්‍රව්‍ය හා පාතාල ක්‍රියාකාරකම් සඳහා යොදා ගන්නා ත්‍රිරෝද රථ කඩිනමින් හඳුනා ගැනීමත්, සංචාරකයින්ට හිරිහැර කරන පුද්ගලයන් කොටු කර ගැනීමත් මෙම වැඩසටහනේ අරමුණයි.
වැලිගම පොලිස් වසමේ දැනට ත්‍රිරෝද රථ 300ක් පවතින බවත්, සමාරම්භක වැඩසටහනේදී ප්‍රදේශයේ තිබු ත්‍රිරෝද රථ 300න් 127කින් විස්තර ලබාගෙන, රියදුරන්ගේ ඡායාරූප ගත් බවත් රථවාහන අංශයේ ස්ථානාධිපතිවරයා වැඩිදුරටත් සඳහන් කළේය.
