කෝප් කමිටුව ඉදිරියේ ලංකා විදුලිබල මණ්ඩලයේ සභාපතිවරයා විසින් කරනු ලැබූ ප්‍රකාශය හේතුකොටගෙන මහජන නියෝජිතයින් හැටියට තමන්ගේත්, මහජන නියෝජිතයින් විශාල පිරිසකගේ වරප්‍රසාද කඩවී ඇති බව විපක්ෂ නායකතුමා පැවසීය.
විදුලි මාෆියාවට එරෙහිව,ප්‍රසම්පාදන ක්‍රියාවලියෙන් බැහැරව කරනු ලබන ගනුදෙනුවලට එරෙහිව සමගි ජන බලවේගයත් සමගි ජන සංධානයත්,කොන්දේසි විරහිතව පෙනී සිටි බව පැවසූ විපක්ෂ නායකතුමා එවන් තත්ත්වයක් තුළ අදාල සභාපතිවරයා විසින් කෝප් කමිටුව අබියස පරස්පර විරෝධී අදහස් ප්‍රකාශ කොට ඇතැයි ද පැවැසීය.
කෝප් කමිටුවේ දී කරන ලද හෙළිදරව් ඉන්පසුව එය ප්‍රතික්ෂේප කිරීමට සභාපතිවරයාට පැමිණි බලපෑම් කවරේද යන්න හෙළිදරව් විය යුතු බවද ඒ මහතා පැවසීය.
