Connect with us
Redmi 9C
Advertisement

Heart

අපේ මුරලිට ඉන්දියාවෙ ගැහුව ‘800’

Published

on

මුත්තයියා මුරලිදරන් ගැන ලංකාවේ කිසිම කෙනකුට අමුතුවෙන් දැන ගන්න දෙයක් නැහැ. ඒ තරමටම ඔහු ගැන අපේ රටේ මිනිස්සු දන්නවා. මුරලිට තියෙන ආදරයත් ඒ වගේමයි. ජාත්‍යන්තර ක්‍රිකට් පිටියෙන් සමු අරගෙන වසර ගණනාවක් ගත වුණත් අදටත් මුරලිට අපේ මිනිස්සු එක වගේ ආදරය කරනවා. මුරලි අපේ රටේ අපිට අයිති උරුමයක් වුණත් ඔහුට ආදරය කරන රසික රසිකාවියෝ ඉන්නේ අපේ රටේ විතරක් නෙවෙයි. මුළු ලෝකය පුරාම මුරලිට ආදරය කරන බොහෝ දෙනෙක් ඉන්නවා. ඒ අතරින් මුරලිට ආදරය කරන වැඩිම පිරිසක් ඉන්නේ ඉන්දියාවේ කිව්වොත් ඒකේ වරදක් නැහැ. ඒ වගේම තම පවුලේ පාර්ශවයෙන් සහ බිරිඳ හරහා මුරලිට ඉන්දියාව එක්ක නැදෑකමකුත් තියෙනවා.

මුත්තයියා මුරලිදරන් නැමැති විශිෂ්ට ක්‍රිකට් ක්‍රීඩකයාගේ ජීවිත කතාව පදනම් කර ගනිමින් චිත්‍රපටයක් නිර්මාණය කිරීමට දකුණු ඉන්දීය නිර්මාණකරුවන් කිහිප දෙනෙක් තීරණය කළෙත් අන්න ඒ ආදරය හින්දම තමයි. හැබැයි මේ චිත්‍රපටය නිර්මාණය කරන එක හිතුව තරම් ලේසිය දෙයක් වුණේ නැහැ. විශාල ජන ගහණයක් වාසය කරන දකුණු ඉන්දියානු ජනතාවගේ සිතුම් පැතුම් විවිධාකාරයි. ඒ හින්දා මුරලි ගැන චිත්‍රපටයක් නිර්මාණය කරන එකට ඒ සමාජයෙන්ම ලොකු විරෝධයකුත් තිබුණා. මීට අවුරුදු දෙකකට විතර කලින් තමයි මේ චිත්‍රපටය ගැන මූලික සාකච්ඡා ආරම්භ වුණේ. වෙන්කට් ප්‍රභූ නැමැති ජනප්‍රිය දකුණු ඉන්දීය අධ්‍යක්ෂවරයා තමයි මෙහි අධ්‍යක්ෂණය බාරව හිටියේ. ඒ වගේම ජනකාන්ත නළු විජය සේදුපති මුරලිගේ චරිතයට පණ පොවන බව දැන ගන්න ලැබුණා.

කොහොම වුණත් සමාජයෙන් එල්ලවුණු විරෝධතා මත චිත්‍රපටයේ වැඩ කටයුතු දිනෙන් දින ප්‍රමාද වුණා. ඒ සඳහා වෙනත් අධ්‍යක්ෂවරයෙක් යොදා ගන්න නිෂ්පාදකයන්ට සිද්ධ වුණා. ප්‍රධාන චරිතය නිරූපණය කිරීමට තෝරා ගෙන තිබූ විජය සේදුපති පවා ඒ චරිතය ගැන මුනිවත රැක්කා. මුරලි වගේ චරිතයකට සමාජයෙන් මේ තරම් විරෝධයක් එල්ල වෙන හේතුව මොකක්ද කියලා කෙනෙකුට හිතෙන්න පුළුවන්. ශ්‍රී ලංකාවේ පැවැති ජන වාර්ගික අර්බුදයේදී ඔහු ශ්‍රී ලංකා රජය සමඟ සමීපව වැඩ කටයුතු කිරීම ඊට ප්‍රධාන හේතුවක්. ඒ වගේ තවත් කාරණා කිහිපයක් හේතුවෙන් මුරලි පිළිබඳ විරෝධයක් දකුණු ඉන්දීය සමාජයේ පවතින බව සඳහන්.

කොහොම වුණත් පසුගිය වසරේ ජූලි මාසයේදී නැවත වරක් මේ චිත්‍රපටය ගැන කතාබහ මතු වුණා. ඒ වන විටත් විජය සේදුපති විසින් මෙහි ප්‍රධාන චරිතය නිරූපණය කරන බව ප්‍රසිද්ධියේ ප්‍රකාශ කළා. විජය සේදුපති මෙම චිත්‍රපටියට සම්බන්ධ නොවිය යුතු බවට දැඩි විරෝධයක් ඉන්දියාවේ ඇතැම් පිරිස් තුළත් ශ්‍රී ලංකාවේ පිරිස් තුළත් මතුවන ආකාරය ඒ අවස්ථාවේදීත් දැක ගන්න ලැබුණා. ඒ සියලු විරෝධතා මත මුරලි ජීවිත කතාව ඇතුළත් චිත්‍රපටයේ රූප රාමු පෙළක් පසුගියදා මාධ්‍යයට නිකුත් වුණා. ලෝකයේ ටෙස්ට් කඩුලු 800ක් දවාගත් එකම පන්දු යවන්නා වීම සංකේතවත් කිරීම සඳහා මෙම චිත්‍රපටය නම් කර ඇත්තේ 800 ලෙසින්.

මුරලිගේ ජීවිත කතාව පිළිබඳ අප දන්නා බොහෝ දේ සහ අපි මෙතෙක් නොදැන සිටි බොහෝ දේත් මේ චිත්‍රපටය තුළ ඇතුළත් බව තමයි දැන ගන්න ලැබෙන්නේ. කවුරුත් දන්නා පරිදි 1983 කළු ජූලිය මුරලිගේ ජීවිතයේ අමතක නොවන අවස්ථාවක්. චිත්‍රපටය තුළ ඒ දර්ශණ පෙළ හරි අපූරුවට ගොනු කරලා තියෙනවා. ඒ වෙද්දී ඔහුගේ වයස අවුරුදු 11ක් පමණ වන ආකාරයක් තමයි දැක ගන්න ලැබෙන්නේ. කළු ජූලිය අතරතුර මුරලිගේ මව මුත්තයියා ලෙස කෑගසන දර්ශනයකුත් පියතුමෙකු වෙත මුරලිව භාරදී ඔහුගේ මව ඉන් බැහැරව යන දර්ශනයකුත් එහි අඩංගු වෙනවා. කළු ජූලියෙන් පසු මුරලිගේ සමීප ඥාතීන් බොහෝ දෙනකු ඉන්දියාවට බලා ගිය නමුත් මුරලි සමඟ ඔහුගේ පවුලේ උදවිය ලංකාවෙම නතර වෙනවා. ඉන් අනතුරුව පාසලේ ක්‍රිකට් පුහුණුකරු පැමිණි පුහුණුවීම්වලට පැමිණෙනවාද කියා විමසන දර්ශනයක්ද චිත්‍රපටයට ඇතුළත්. කවුරුත් දන්නා පරිදි මුරලිගේ ජීවිතයේ හැරවුම් ලක්ෂය තමයි ඒ. ඒ වගේම ජාත්‍යන්තර ක්‍රිකට් පිටියේ ඔහුගේ පන්දු යැවීමේ ඉරියව් නීතිවිරෝධි යැයි විනිසුරු ඩැරල් හෙයාර් විසින් සංඥා කළ අවස්ථාව මෙන්ම 1996 ලෝක කුසලාන තරගාවලිය ආසන්නයේදී කොළඹ සිදුවූ බෝම්බ පිපිරීම දර්ශනයක්ද චිත්‍රපටයට ඇතුළත්. එමෙන්ම බොහෝ දෙනාගේ අවධානයට ලක් වූ 2009 වසරේදී ශ්‍රී ලංකා කණ්ඩායම ඉලක්ක කර ගනිමින් එල්ල වූ බෝම්බ ප්‍රහාරය සම්බන්ධ දර්ශණයක්ද චිත්‍රපටය ඇතුළත්.

මුරලිගේ ජීවිත කතාව අලලා නිෂ්පාදන වන 800 චිත්‍රපටය බොක්ස් ඔෆිස් වාර්තා බිඳ දමන චිත්‍රපටයක් බවට පත් වනු ඇති බව තමයි මේ දර්ශණ දකින ඕනෑම කෙනකුට හිතෙන්නේ. 800 චිත්‍රපටයේ අධ්‍යක්ෂවරයා ලෙස එම්.එස් ශ්‍රීපතිද, සංගීත අධ්‍යක්ෂණය සෑම් සී.එස්., කැමරා අධ්‍යක්ෂකවරයා ලෙස ආර්.ඩී රාජසේකර්ද කටයුතු කරනවා.

දහසක් විරෝධතා මධ්‍යයේ මුරලිගේ භූමිකාවට පණ දුන් විජය සේදුපතිගේ රංගනයත් අති විශිෂ්ට බව තමයි මේ දර්ශණ පෙළ නැරඹූ ජාත්‍යන්තර විචාරකයන් ප්‍රකාශ කරලා තිබුණේ. ඒ වගේම තම රටේ රසිකයන්ගේ විරෝධතා මැද අපේ වීරයෙකුගේ චරිතය සිනමා පටයකට ගෙන ඒමට කටයුතු කිරීම ගැන විජය සේදුපතිට අපි හැම දෙනාගේම ගෞරවයත් හිමි විය යුතුයි. චිත්‍රපටය තිරගත වීම ඇරඹුනාට පස්සේ විජය සේදුපති ගැනත් කතා කරන්න තවත් බොහෝ දේ තියේවි කියලයි අපිට නම් හිතෙන්නේ.
චන්දන පොන්නම්පෙරුම

Continue Reading
Click to comment

Leave a Reply

Your email address will not be published. Required fields are marked *

Advertisement
Advertisement