පිංපොංගේ මීළඟ සිහිනය

පසුගිය කාලේ රටේ අනාගතය වෙනුවෙන් හඬනඟපු රංගන ශිල්පීන් කොතරම් ඇතිද? ඒ අතර බොහෝදෙනෙක් හඬ අවදි කළේ තමන්ගේ වාසිය පතා. එහෙමත් නැතිනම් නිල තනතුරු වෙනුවෙන්. එහෙත් කිසිම දෙයක් බලාපොරොත්තු නොවී කටයුතු කළ කලාකරුවන් අතර සුවිශේෂී කලාකරුවෙක් තමයි රජිත හිරාන් (පිංපොං).
පිංපොං ඉතින් කොහොමද?
අලුත් අවුරුද්දේ අලුත්ම අලුත් වැඩකටයුත්තක් සැලසුම් කරගෙන යනවා. මේ දවස්වල ඉතින් දේශීය, විදේශීය ප්‍රසංග එක්ක තමයි කටයුතු කරන්නේ.
2020 වසර ආරම්භයත් එක්ක ඔබ අලුත් පියවරක් තැබීමට උත්සාහ කරන බව අපටත් දැනගන්න ලැබුණා.
ඔව්. මගේ ලොකු ආශාවක් තිබෙනවා චිත්‍රපටයක් අධ්‍යක්‍ෂණය කරන්න. එය මගේ සිහිනයක්. මොකද විවිධ අයගේ නිර්මාණවල විවිධ චරිත මම නිර්මාණය කළා. ඉතින් ඒ දැනුම් සම්භාරයත් අත්දැකීම් එකතු කරගෙන මගේම කියලා දෙයක් කරන්න මම හිතුවා මේ වසරේ. දැනටමත් මම ලියපු පිටපත් කිහිපයක් තියෙනවා. හොඳ කතාවක් මම නිර්මාණය කරනවා. මොකද කලාකරුවන්ට වගේම මගේ ඉරණමේ හැටියට 2020 මට හොඳ වසරක් වෙන බව සඳහන් වුණා.
රජිත ජ්‍යොතිෂය අනුවද වැඩ කරන්නේ?
මම ජ්‍යොතිෂය කියන දේ විශ්වාස කරන කෙනෙක්. මම මොන කටයුත්ත කරන්න ගියත් ජ්‍යොතිෂය අනුව තමයි මම වැඩ කරන්නේ. ග්‍රහ අපල, කර්ම අනුව ඉදිරිය ගැන මම බලනවා. ඒ වගේම ඒ සම්බන්ධ පොතපත මම කියවනවා. ඒ නිසා මට එය පිළිබඳ යම් දැනුමක්, විශ්වාසයක් තිබෙනවා. පසුගිය කාලේ ජ්‍යොතිෂය අනුව නරක ප්‍රතිඵල තිබුනෙ මට විතරක් නෙවේ රටටම එය බලපෑවා. ඔය කාල වකවානුවෙ මම රට හැර ගිහින් නැවැත ආපහු ආවා. අපේ කලා වෘත්තියම කඩාවැටුණා. ඒ විතරක් නෙවේ ජනතාව අසරණ වුණා.
ඔබ ජනතාව වෙනුවෙන්, රටක් වෙනුවෙන් කෙළින් කතා කරපු කලාකරුවෙක්. ඔබට පසුකාලීනව මරණ තර්ජන පවා එල්ල වුණාලු නේද?
2015 වසරේ උගුර ලේ රහ වෙනකම් මම කතා කළේ ඔය ගැන තමයි. නමුත් කියන කිසිම දෙයක් ඇහුවේ නැහැ. අවසානය වූයේ ජාති, ආගම් නොතකා රටේ භීෂණයක් ඇතිවීමයි. මම කියපු කාරණා ඇත්ත බව පසුව හැමෝම තේරුම් ගත්තා. දැන්නම් ජනතාව තේරුම් අරගෙන. ඒ තේරුම් ගන්න කොට ගොඩාක් දේවල් නැති කරගෙන. මට දැනුණු දේ ඇයි අනෙක් අයට නොදැනුණේ කියන දේ හිතද්දී මම කලකිරිලා හිටියේ. 2020 දැන් අපිට හොඳ ජනාධිපතිවරයෙක් ඉන්නවා. එතුමන් රටට කරන සේවය මාස දෙකකින් අපි දැක්කා. දැන් මුළු රටටම නිදහසේ හුස්ම ගන්නවා. සුන්දර ලංකාවක් ඉදිරියේදී දැකබලා ගන්න පුළුවන්. මම මේ හැම දේම කළේ මගේ ජීවිතය ගැන නොහිතා. මට ආපු තර්ජන මම දැන් කියන්න යන්නේ නැහැ.
රජිත ඔබ දේශපාලනය වෙනුවෙන් හඬක් නඟන්න ගිහින් එක් අවස්ථාවක බොලිවුඞ් සිහිනය බොඳවෙලා ගියානේද?
ලාල් වීරසිංහ, මම සහ චන්න පෙරේරා දමිළ ඉන්දියානු චිත්‍රපටයක වැඩ කළා. එක අවස්ථාවක ඉන්දියාවට ගිහින් චිත්‍රපටයක් රඟපාන්න අවස්ථාව ලැබුණා. ඒත් මට ඒ අවස්ථාවේ සියල්ල අතහැර රට වෙනුවෙන් කටයුතු කළා. සමහරු මට බැන්නා දේශපාලනයක් වෙනුවෙන් එවැනි චිත්‍රපටයක් අතහරින්න ගොනෙක්ද කියලා. මොනව කරන්නත් අපි නිදහසේ හුස්ම ගන්න ඕනෙ. මම ඉන්දියාවට ගිහින් රඟපායි නමුත් මම නැවැත එන්නේ මගේ මව් රටට.
පසුගිය කාලේ රජයේ සහ පෞද්ගලික මාධ්‍ය නාළිකාවල ඔබට දොර වැහුණා නේද?
එය ගැන මට කිසිම කනගාටුවක් නැහැ. පසුගිය කාලේ ස්වාධීන රූපවාහිනියේ වැඩසටහනකටවත් මාව සම්බන්ධ කරගත්තේ නැහැ. සමහර ශිල්පීන් මාව නිර්මාණවලට ගත්තේ නැහැ. මොකද ඒ නිර්මාණ රජයේ රූපවාහිනි නාළිකාවල විකාශය වීමට භාරගත්තොත් මම නිසා ප්‍රශ්නයක් වෙයි කියලා නිර්මාණකරුවාට. රාජ්‍ය නාළිකා කියලා බලපාන්නේ නැහැ. රාජ්‍ය පුවත්පත්වල මම ගැන කතා කළේ නැහැ. අනෙක මට වෙන අය වගේ බෝතල් සාද පවත්වලා පත්තරවල ලිපි පළකරගන්න වුවමනා නැහැ. හැබැයි එහෙම පිරිසක් ඉද්දි තවත් පැත්තකින් පෞද්ගලික නාළිකා මම වෙනුවෙන් ඉඩක් වෙන් කළා. විශේෂයෙන්ම ‘මව්රට’ පත්තරය වගේම තවත් පුවත්පත් කිහිපයක් මට ශක්තියක් වුණා. එය ගැන මට සතුටක්. ඔවුන් මම ගැන නිතර දෙවේලේ හොයලා බලලා කටයුතු කළා.
වසන්ත විතාරණගේ