තවම නැටිල්ල අතඇරලා නෑ…
චිත්‍රපට පැත්තෙන් නම් ලොකුවට ආරාධනා ලැබුණෙ නෑ…
එදා මෙන්ම අදටත් ප්‍රසංග වේදිකාවේ හැඩ වැඩ දාන නර්තන ශිල්පිනියක් තමයි නිරෝෂා තලගල. ඉතින් ඇය කාලෙකට පස්සේ නැවැත ටෙලිනාට්‍යවලට යොමුවෙලා. ඇයගේ රඟමඩලේ දිවි පෙවෙත ගැන ඇය සමඟ කතාබහ කිරීමට හිතුවේ මේ විදියටයි.
නිරෝෂාත් මේ දවස්වල ගෙදරට කොටුවෙලාද?
ඔව් ඉතින් මම විතරක් නෙමේ රටේ සියලුම ජනතාවට ගෙදරට වෙලා ඉන්න සිද්ධවෙලා තියෙන්නේ. ලෝකයටම බලපෑව මේ කොරෝනා වසංගතය නිසා මගේ බබත් තවම පොඩි නිසා විශේෂ සැලකිල්ලක් ඇතිව ආරක්ෂාකාරීව ප්‍රතිශක්තිකරණය ගැන වැඩිපුර සිතමින් වැඩකටයුතු කරගෙන යනවා.
මේ දවස්වල ටෙලිනාට්‍ය කිහිපයකම ඔබව දකිනවා. රූගත කිරීම් කටයුතු සිදුවෙන්නේ කොහොමද?
මහවිරු පණ්ඩු, අමාලියා, ඉඟිබිඟි ටෙලිනාට්‍යවලට තමයි මම සම්බන්ධ වෙන්නේ. පසුගිය දින කිහිපයේ රූ ගත කිරීම් නතර කරලා තිබුණේ. ඒත් දැන් රූ ගත කිරීම් කටයුතු නැවැත පටන් ගත්ත නිසා එයට සම්බන්ධ වෙන්න සිදුවෙනවා.
ඔබ සෑහෙන කාලෙකට පස්සෙ නේද ටෙලිනාට්‍යවලට සම්බන්ධ වුණේ?
දරුවා ලැබෙන්න ඉන්න නිසා මම එය ගැන වැඩිදුර හිතුවා. අවුරුදු දෙකකින් විතර තමයි මම නැවැත රඟපාන්න සම්බන්ධ වුණේ. මම රඟපෑවේ නැහැ කියලා එය කාටවත් දැනුණේ නැහැ. මොකද මම සම්බන්ධ වුණ නිර්මාණ ඔය කාලවකවානුව අතර විකාශය වුණා.
‘අමාලියා’ ටෙලිනාට්‍ය හරහා ඔබේ සුවිශේෂී රංගනයක් දකිනවා. එය ගැන කතා කළොත්?
අද සමාජයේ බොරුවෙන් මිනිසුන් රවටන සාත්තරකාරයින් ඕනෑ තරම් ඉන්නවා. එවැනි චරිතයක් තමයි මම ‘අමාලියා’ ටෙලිනාට්‍යයේ රඟපාන්නේ. මම මෙයට කලින් ‘දේවි’ ටෙලිනාට්‍යයෙත් ජ්‍යොතිෂයට සම්බන්ධ චරිතයක් නිරූපණය කළා. ජ්‍යොතිෂය සම්බන්ධව සොයා බලමින් තමයි ඒ නිරූපණය කළේ. නමුත් සාත්තරය පිළිබඳව මම හොයන්න ගියේ නැහැ.
ඉතින් දරුවාගේ වැඩකටයුතු එක්ක රංගන කටයුතු සිදුකර ගන්නේ කොහොමද?
මම මොන තරම් කාර්යබහුල වුණත් මගෙන් වියයුතු යුතුකම් මම මඟහරින්නේ නැහැ. ගෙදර වැඩ කටයුතු වගේම දරුවාගේ වැඩකටයුතු සියල්ලමත් සිදුකෙරෙන්නේ මගේ අතින්.
අද ටෙලිනාට්‍ය නිර්මාණය වෙන්නේ කරන්නම්වාලේටද?
ප්‍රධාන වශයෙන් වෙලාවට වැඩ කරන්නැති වුණාම සියල්ලම අඩාළ වෙනවා. උදේ පාන්දර ගෙදරින් ගිහින් දවල් වෙලා රූපගත කිරීම් සිදුකරන්න ගත්තාම අපි පවා අසරණ වෙනවා. මම මේ ක්ෂේත්‍රයට ආපු කාලේ ප්‍රවීණ ශිල්පීන්ගෙන් ඒ කාල වකවානුවේ ටෙලිනාට්‍ය හැදුණු පිළිවෙළ ගැන අහලා තියෙනවා. ඒත් දැන් ශිල්පීන් මරවලා තමයි වැඩ ගන්නේ. එහෙම වුණාම නිර්මාණයක කිසිම හරයක් දකින්න බැහැ.
ටෙලිනාට්‍ය තුළ නිතර දකින රුවක් නිසා ඔබට සිනමාවේ ඉඩකඩ අඩුද?
චිත්‍රපට පැත්තෙන් නම් මට එහෙම ලොකුවට ආරාධනා ලැබුණේ නැහැ. සමහරු එහෙමත් හිතනවා. මම මේ ක්ෂේත්‍රයට ඇවිල්ලා අවුරුදු දොළහක් විතර වෙනවා. මේ වන විට චිත්‍රපට හයක විතර රඟපාලා ඇති මම.
ඔබේ නර්තන වැඩකටයුතු නිසා වේදිකා නාට්‍යවල රඟපෑම අත්හැරියාද?
මම වේදිකාවට ගොඩක් ආදරෙයි. වේදිකා නාට්‍ය කිහිපයකම රඟපෑවා. ඒත් මගේ සිහිනයක් තිබුණේ මගේම කියලා ඩාන්සින් කණ්ඩායමක් හදාගන්න. ඉතින් ඒ සිහිනය සැබෑ වීමත් එක්ක මට ඒ වෙනුවෙන්ම කාලය ගතකරන්න සිද්ධ වුණා.
ඉස්සර වගේම අදටත් හොඳට නටන්න පුළුවන්ද?
මොකද බැරි. මට හොඳට නටන්න පුළුවන්. මගේ කණ්ඩායමත් සමඟ මම ප්‍රසංගවලට සම්බන්ධ වෙනවා. තවම නැටිල්ල අත්හැරලා නැහැ.
වසන්ත විතාරණගේ
