රන්වීර් කපිල් දේව් වෙයි

ක්‍රිකට් ගැන ඕනෑවටත් වඩා උමතු වූවන් සිටින්නේ ඉන්දියාවේය.
ක්‍රිකට් ක්‍රීඩකයන්ට දේවත්වයෙන් සලකන ඉන්දියානු රසිකයන් ඔවුන් බින්දුවට අවුට් වූ විට ‘ගෝ හෝම්’ තියරියට සලකමින් ඔවුනට අයත් දේපොළවලටද හානි කරන්නේ ඒ උමතුව නිසාමය. සචින් තෙන්ඩුල්කාර්, රවී ශාස්ත්‍රි, සුනිල් ගවස්කාර්, මොහොමඞ් අසරුදීන් යන ක්‍රිකට් ක්‍රීඩකයන් ඉන්දියානුවනට ජාතික වස්තූන් වැනිය.
කපිල් දේව් ද ඒ අතර සුවිශේෂී චරිතයකි.

1983 ලෝක කුසලාන ඉන්දියාවට ගෙන දෙන්නට කපිල් දේව් මූලික කණ්ඩායම කළ මෙහෙවර ඉන්දියානුවන්ට කිසිසේත්ම අමතක නැත. ලෝක කුසලානය සඳහා ඉන්දියාව සූදානම් වන සෑම මොහොතකම ‘83 ලෝක කුසලානය දිනාගත් විවිධාකාර ස්ලෝගන් ඉන්දියානු මංමාවත් ඔස්සේ තවමත් දිස්වන්නේ කපිල් දේව්ගේ ජයග්‍රාහී රුව සමඟය. ක්‍රිකට් පිස්සන් සිටින ඉන්දියානුවන්ට 1983 ලෝක කුසලාන තේමාවක් කරගත් චිත්‍රපටයක් තිළිණ කරන්නට ප්‍රවීණ චිත්‍රපට අධ්‍යක්‍ෂ කබීර් ඛාන්ට සිතුණේද එවැනි ස්ලෝගන් එකක් මුහුණ පොත ඔස්සේ දුටු විටකය.ඉන්තේරුවෙන්ම එය මුදල් උපයන උල්පතක් වන බව කබීර් ඛාන්ට ද ඒත්තු ගියේ චිත්‍රපට නිෂ්පාදනය සඳහා කිහිප දෙනකුම තමා හමුවේ පෙළ ගැසුණු නිසාය.

චිත්‍රපටයට මූලික වන්නේ ‘ශ්‍රේෂ්ඨ ක්‍රිකට් ක්‍රීඩක කපිල් දේව්ගේ’ චරිත කතාවය. එයින් අනතුරුව එය 1983 ලෝක කුසලානය සමඟ ඉතා සොඳුරු සම්බන්ධතාවකට මුල පුරන්නේ සිත් අලවනසුලු රූප රාමු සමඟය. ප්‍රවීණ උතුරු ඉන්දීය නිළියකව සිටි සරීකාගේ චරිතය මෙයට සම්බන්ධ කරන්නේද යන්න ගැන කබීර් ඛාන් තවම සිතුවේ නැති බව ඔහුගේ ට්විටර් ගිණුමෙහි සඳහන්ව ඇත.

සරීකා සමඟ කපිල් දේව්ගේ බැඳීම එවකට ඉතා ප්‍රේමනීයව තිබිණි. ‘කමල් හසන්’ පැත්තකින් සිට ජයග්‍රාහී උඩ පන්දුවක් ලෙස කපිල් දේව් වෙතින් ඈව උදුරා නොගත්තා නම් ඒ සුන්දර ප්‍රේමය සාගරය තුළ කපිල් අදටත් කිමිදෙන්නට තිබිණි.
කපිල් දේව්ගේ චරිතය සඳහා කබීර් තෝරා ගත්තේ ‘රන්වීර් සිංග්’වය. ඔහු එය භාරගෙන තිබුණේ ඉතාම ගෞරවනීය ලෙසය.

චිත්‍රපටයට තවමත් නමක් යොදා නොතිබුණත් ඒ වෙනුවෙන් පසුබිම සැකැසීම ආරම්භ වී ඇත. රන්වීර් සිංග් මේ දිනවල සිටින්නේ නවදිල්ලියේය. හැමදාමත් උදේ – හවස කපිල් දේව් හමුවීමට යන රන්වීර් කපිල්ගේ හැසිරීම්, අංග චලනයන්, කතා-බහ සමඟ ක්‍රීඩා ශෛලිය ගැනද වියත් දැනුමක් ලබමින් සිටියි.
කපිල් දේව් පිටියට පැමිණෙන ආකාරය, පිත්ත හැසිරවීම, පන්දු යවන අන්දම, උඩ පන්දුවක් රැකගන්නා අන්දම ගැන රන්වීර් ඉතා සියුම්ව ග්‍රහණය කර ගනිමින් සිටින්නේ පරණ ‘ඩීවීඩී’ තැටිද නරඹමිනි.

රූපවාහිනී සාකච්ඡාවකට පැමිණි කපිල් පසුගිය සතියක කියා සිටියේ,
‘තමාටත් වඩා අපූරුවට රන්වීර් තම චරිතය රඟදක්වනු ඇතැයි කියාය.
ඉතා කදිමට ඔහු තව අධ්‍යයනය කරමින් සිටිනවා. තරුණ මිනිසකු ලෙස ක්‍රිකට් සෙල්ලම් කරපු දවස්වල, මා කළ කී දෑ ගැන ඔහු මගෙන් ඇසූ ආකාරය හරිම අපූරුයි. සමහර උත්තර සඳහා මට බොහෝ ඈතට යන්නට සහ මනෝභාවයට පත්වන්නට සිදුවුණා.
රන්වීර් පිත්ත හැසිර වූ ආකාරය ගැන මට පුදුමත් හිතුණා. ඇත්තෙන්ම කබීර් ඛාන්ගේ තේරීම හරිම අපූරුයි. චිත්‍රපටය ගැන කිසිම අඩුවක් පාඩුවක් කියන්නට කාටවත්ම රන්වීර් ඉඩ නොතියන බව විශ්වාසයි.’

කපිල් දේව් කීවේ තිර හඬකිනි.
කපිල්ගේ තරුණ බිරිය ‘රෝමී’ ලෙස රන්වීර් සමඟ රඟන්නේ දීපිකා පදුකෝන්ය.
එය හරිම අපූරු සංකලනයක් බව සනාථ කරවමින් මුහුණ පොත හරහා අසීමිත ප්‍රතිචාරයක් ලැබී ඇත.

රූගත කිරීම් ආරම්භ වූ සැණින්ම සමාජ ජාලා වෙබ් අඩවි ඔස්සේ චිත්‍රපටයට විවිධ පැසසුම් ගලා එමින් තිබේ. ප්‍රේක්‍ෂකයන් මේ පිළිබඳව දැඩි උන්මාදයට පත්ව සිටින්නේ, කඩි ගුලක් ඇවිස්සුණු ආකාරයටය.

‘2020 අප්‍රේල් 10 වැනි දින මම ඔබේ පවස නිවා දමමි,’ යනුවෙන් රන්වීර් සිංග් තමා වෙත ලැබෙන ට්විටර් පණිවුඩ හමුවේ ප්‍රතිචාර දක්වා ඇති අතර,
‘කපිල් දේව්’ යනු මහා ශ්‍රේෂ්ඨයෙකි. ඔහු වැනි වෙනත් අයකු සොයා ගැනීම අපහසුයැ’
යනුවෙන්ද ගෞරවනීය සටහනක් ඒ සමඟ එක්කර ඇත.
දමයන්ති රේණුකා ප්‍රනාන්දු