Connect with us

News

ගාමිණීගේ පුතා වළපනේ ‌‌හේරත්ගේ දුවට ‌මේ පාරත් පරදියිද?

Published

on

ඉතිහාසය නැවත වරක් ප්‍රති නිර්මාණය වන බව ජනප්‍රිය කියමනකි. එය බොහෝ දේට එකසේ අදාළය. ශ්‍රී ලංකාවේ දේශපාලනය තුළද එම කියමන සනාථ වූ අවස්ථා පිළිබඳ උදාහරණ රාශියක් සොයා ගත හැකිය. පාර්ලිමේන්තු මැතිවරණය පිළිබඳ උණුසුම රටම වෙළා ගෙන ඇති මොහොතකදී ශ්‍රී ලංකාවේ දේශපාලන ඉතිහාසයේ සිදුවූ දෙයක් නැවත සිහිපත් කරන අවස්ථාවක් නුවරඑළිය දිස්ත්‍රික්කයෙන් අසන්නට ලැබිණි. ඒ එක්සත් ජාතික පක්ෂයේ හිටපු ඇමැතිවරියක වන රේණුකා හේරත් මහත්මියගේ දියණිය නීතිඥ හිරන්‍යා හේරත් මහත්මිය සජිත් ප්‍රේමදාස මහතාගේ නායකත්වය යටතේ සමඟි ජන බලවේගය පක්ෂයෙන් මෙවර මහ මැතිවරණයට ඉදිරිපත් වන බව ප්‍රකාශ කිරීමත් සමඟිනි.එක්සත් ජාතික පක්ෂයේ වලපනේ ප්‍රධාන සංවිධායකවරිය ලෙස කටයුතු කරන හිරන්‍යා හේරත් මහත්මියට සජිත් ප්‍රේමදාස මහතා යටතේ ජාතික සමඟි බලවේගයෙන් තරග කරන ලෙස වලපනේ ජනතාව ඇගෙන් ඉල්ලා සිටි බවද මාධ්‍ය ඔස්සේ වාර්තා විය. රේණුකා හේරත් මහත්මියගේ දියණිය සජිත් ප්‍රේමදාස මහතා සමඟ එක්ව නුවරඑළිය දිස්ත්‍රික්කයෙන් මැතිවරණයට ඉදිරිපත් වීම සුවිශේෂී කාරණයක් වන්නේ, නුවරඑළිය දිස්ත්‍රික් එජාප බල කණුව සේ සැලකෙන හිටපු අමාත්‍ය ගාමිණී දිසානායක මහතාගේ පුතු වන නවීන් දිසානායක මහතා රනිල් වික්‍රමසිංහ මහතා සමඟ එක්ව අලියා ලකුණින් මැතිවරණයට ඉදිරිපත් වීමට තීරණය කිරීමත් සමඟය. ඉතිහාසය නැවත වරක් ප්‍රතිනිර්මාණය වීම මේ කතාවට ඈඳෙන්නේ ඒ හරහාය.
අද සජිත් ප්‍රේමදාස මහතා අලියා ලකුණ අත්හැර පොදු සන්ධානයක් යටතේ තරග වැදීමට සූදානම් වෙද්දී, මීට වසර 27කට පෙර එනම් 1993 වසරේ පැවැති පළාත් සභා මැතිවරණයේදී එක්සත් ජාතික පක්ෂයේ හිටපු ප්‍රබලයන් වූ ගාමිණී දිසානායක මහතා සහ ලලිත් ඇතුලත්මුදලි මහතා ඇතුළු පිරිසක් එජාපය අත් හැර යමින් රාජාලියා ලකුණ යටතේ තරග වැදුණහ. එවකට එක්සත් ජාතික පක්ෂයේ නායකත්වය දැරුවේ සජිත් ප්‍රේමදාස මහතාගේ පියාණන් වූ හිටපු ජනාධිපති රණසිංහ ප්‍රේමදාස මහතාය.
ගාමිණී, ලලිත් ඇතුළු ප්‍රබලයන් පක්ෂය හැරගොස් වෙනම තරග වදිද්දී, රණසිංහ ප්‍රේමදාස මහතාගේ ශක්තියට එක්සත් ජාතික පක්ෂයේ ඉතිරි වූ පිරිස අතරින් ප්‍රබල භූමිකාවක් රඟ දැක්වූ එක් තැනැත්තියක් වූයේ හිරන්‍යා හේරත් මහත්මියගේ මව වන රේණුකා හේරත් මහත්මියය. එම අවස්ථාවේ හේරත් මහත්මියගේ භූමිකාව ප්‍රබල එකක් වීමට හේතු වූයේ ඇය සහ ගාමිණී දිසානායක මහතා නුවරඑළිය දිස්ත්‍රික්කය නියෝජනය කිරීම මතය. රට පුරා විශාල ජනතා පැහැදීමක් සහ විශාල දේශපාලන බලයක් සතුවූ ගාමිණී දිසානායක මහතා වැනි ප්‍රබලයකුට එරෙහිව රණසිංහ ප්‍රේමදාස ජනාධිපතිවරයා සමඟ එක්ව රේණුකා හේරත් මහත්මිය ක්‍රියා කළ ආකාරය එකල රට තුළ දැඩි බහකට ලක් විය.
රේණුකා හේරත් මහත්මියට ඒ සඳහා නුවරඑළියේදී ශක්තිය ලබා දුන්නේ කාන්තාවක් වීමද විශේෂත්වයකි. ඒ නුවරඑළිය හිටපු නගරාධිපතිනී නලින් තිලකා හේරත් මහත්මියය. නලින් තිලකා හේරත් මහත්මිය සහ රේණුකා හේරත් මහත්මිය එක්ව ගෙන ගිය සටන හමුවේ ගාමිණී දිසානායක මහතාට එකල නුවරඑළිය නගරයේ රැලියක් හෝ පැවැත්වීමට අවස්ථාව නොලැබුණු බව බොහෝ දෙනා දන්නා කරුණකි. නලින් තිලකා හේරත් මහත්මිය සහ රේණුකා හේරත් මහත්මිය එකල හැඳින්වූයේ නුවරඑළියේ යකඩ ගැහැනුන් ලෙසින්ය.
ඉදිරි මැතිවරණයට ඉදිරිපත්වීමට තීරණය කිරීම පිළිබඳව අප හිරන්‍යා හේරත් මහත්මියගෙන් අදහස් විමසූ අවස්ථාවේ ඇය සඳහන් කර සිටියේ තමන් සජිත් ප්‍රේමදාස මහතා සමඟ එකතු වීමට තීරණය කළේ ජනතාවගේ ඉල්ලීම මත බවය.
“පක්ෂයක් කියන්නේ පාක්ෂිකයන්. නැතුව නමක් නෙවෙයි. ඉතින් මේ වෙලාවේ සියලුම එක්සත් ජාතික පක්ෂ පාක්ෂිකයන් කියන්නේ සජිත් ප්‍රේමදාස මහතා සමඟ එක්ව ඉදිරියට යන්න කියලයි. ජනතාවගේ ඒ ඉල්ලීම මත තමයි මම මගේ තීරණය ගත්තේ. අපේ අම්මා 1977 දේශපාලනයට එද්දී තිබුණු එක්සත් ජාතික පක්ෂය නෙවෙයි අද තියෙන්නේ. එදා දුප්පත් ජනතාවගේ පක්ෂයක් විදියට තිබුණු පක්ෂය දැන් එක්තරා පන්තියක් අතට පත් වෙලා තියෙනවා. ඉතින් අපිට ඉදිරි ගමනක් තියෙන්න නම් ඒ හරහා ජනතාවට සේවය කරන්න නම් අපිට කරන්න පුළුවන් සජිත් ප්‍රේමදාස මහතාට ශක්තිය ලබා දෙන එක විතරයි. ජනතාව ඉල්ලන්නෙත් ඒකයි.”
නුවරඑළියේ යකඩ ගැහැනියක් ලෙසින් එකළ රණසිංහ ප්‍රේමදාස මහතාට ශක්තියක් වූ තම මෑණියන් සහ තමන්ගේ දේශපාලන ගමන ගැන හිරන්‍යා හේරත් මහත්මිය අප සමඟ අදහස් පළ කළේ මෙසේය.
“94 වෙනතෙක් අපේ අම්මා මේ ප්‍රදේශයට කරපු වැඩ ගැන තමයි ජනතාව අදටත් කතා කරන්නේ. ඒ වගේම අපේ අම්මා ගත්ත දේශපාලන තීන්දුත් හරියට ගත්තා. ගාමිණී දිසානායක වගේ ප්‍රබලයෙක් පක්ෂය කඩා ගෙන යද්දී, ප්‍රේමදාස ජනාධිපතිතුමා එක්ක එකතු වෙලා පක්ෂයත්, පාක්ෂිකයනුත් බේර ගන්න එතුමියට පුළුවන් වුණා. ඒ හරහා ජනතාවට විශාල සේවයක් කරන්න අපේ අම්මට පුළුවන් වුණා. අම්මා කරපු ඒ සේවයෙන් භාගයක්වත් ජනතාව වෙනුවෙන් ඉටු කරන එක තමයි මගේ බලාපොරොත්තුව. සජිත් ප්‍රේමදාස මැතිතුමා එක්ක එකතු වෙලා ඒ බලාපොරොත්තුව ඉටු කර ගන්න හැකියාව ලැබෙයි කියලා මට විශ්වාසයි.”
රේණුකා හේරත් මහත්මියට ශක්තියක් වූ නලින් තිලකා හේරත් වැනි ප්‍රාදේශීය දේශපාලනඥයන් මෙවර කොයි ආකාරයෙන් කටයුතු කරාවිදැයි ඇසූ පැනයට හිරන්‍යා හේරත් මහත්මිය පිළිතුරු දුන්නේ මෙසේය.
“අනිවාර්යයෙන්ම. එදා නලින් තිලකා හේරත් මහත්මිය අපේ අම්මට සහයෝගය ලබා දුන්නා වගේම මෙවර නුවරඑළියේ ප්‍රාදේශීය දේශපාලනඥයෝ මට සහ සජිත් ප්‍රේමදාස මැතිතුමාට සම්පූර්ණ සහයෝගය ලබා දෙනවා. මොකද ඒ අයත් එක්කත් කතා කරලා තමයි මම මේ තීරණය ගත්තේ. ඒ හින්දා ඒ ගැන මට කිසිම සැකයක් නැහැ.” ඒ හිරන්‍යා හේරත් මහත්මියගේ අදහස්ය.
මෙවර පාර්ලිමේන්තු මැතිවරණයේදී නුවරඑළිය දිස්ත්‍රික්කය නියෝජනය කරන එක්සත් ජාතික පක්ෂ ප්‍රබලයා නවීන් දිසානායක මහතාය. ඔහුට එරෙහිව ජාතික සමඟි බලවේගයෙන් තරග වදින්නේ රේණුකා හේරත් මහත්මියගේ දියණිය වන හිරන්‍යා හේරත් මහත්මියය. එක්සත් ජාතික පක්ෂය සහ ජාතික සමඟි බලවේගය වෙන්ව තරග වදින බව තවම ස්ථිරවම ප්‍රකාශ වී නැතත්, මේ වන විට පෙන්නුම් කරන වාතාවරණය අනුව එය එලෙස සිදු වීමේ වැඩි ඉඩක් නිර්මාණය වී ඇත. එක්සත් ජාතික පක්ෂ අනන්‍යතාව සමඟින් උපත ලැබුවද, නවීන් දිසානායක මහතාට තරම් දේශපාලනික අත්දැකීම් හිරන්‍යා හේරත් මහත්මිය සතුව නැති බව සැබෑවය. නමුත් ප්‍රබලයන් සමඟින් තරග වැදීමට තම මෑණියන් සතුව පැවැති ශක්තිය තමන්ට ඇති බව ඇය මේ වන විටද ඔප්පු කර අවසන්ය. ගාමිණී දිසානායක මහතාට එරෙහිව තරග වදිමින් නුවරඑළියේදී රණසිංහ ප්‍රේමදාස මහතාට ජනතා ශක්තිය හිමි කර දෙන්නට 1993දී රේණුකා හේරත් මහත්මියට හැකි විය. මෙවර මැතිවරණයේදී හිරන්‍යා හේරත් මහත්මිය එම අභියෝගය කොයි ලෙසකින් භාර ගනීවිද යන්න ඉදිරියේදී දැක බලා ගත හැකි වනු ඇත. මේ සිදුවීමට අදාළව ඉතිහාසය නැවත වරක් ප්‍රතිනිර්මාණය වන්නේ කෙසේදැයි යන්නද, එවිට සැමට පැහැදිලිව තේරුම් ගත හැකි වනු ඇත.
එමෙන්ම එදා ගාමිණී දිසානායක මහතා වෙන්ව යද්දී රණසිංහ ප්‍රේමදාස මහතාට ශක්තියක් වෙමින් රේණුකා හේරත් මහත්මිය යකඩ ගැහැනියක් බවට පත් වූ ලෙසින් මෙවර නවීන් දිසානායක මහතා වෙන්ව යද්දී සජිත් ප්‍රේමදාස මහතාට ශක්තියක් වෙමින් යකඩ ගැහැනියක් බවට පත්වීමට හිරන්‍යා හේරත් මහත්මියට හැකිවේවිද යන්නද ඉදිරියේදී තීරණය වනු ඇත.

චන්දන ‌පොන්නම්පෙරුම

Continue Reading
Click to comment

Leave a Reply

Your email address will not be published. Required fields are marked *

Advertisement
Exclusive10 mins ago

ඇඳිරි නීතිය ගැන අලුත්ම නිවේදනය ‌මෙන්න

Exclusive15 mins ago

මමත් ‌ගෙදර…. (VIDEO)

News2 hours ago

චීන ආණ්ඩුව ගැන ජනතා විශ්වාසය බිඳවැටේ

Exclusive2 hours ago

කොරෝනාවෙන් මව්රට මුදා‌ගෙන ජන්දෙට යන්නද? (උපුල් ‌ජෝශප් ප්‍රනාන්දුගේ ගුරුදා විග්‍රහය)

Exclusive14 hours ago

පළමු මරණය වාර්තා ‌වෙයි: කොරෝනා මරණ ‌ලයිස්තුවට ලංකාවත් එකතු ‌වෙයි

Exclusive15 hours ago

කොරෝනා මධ්‍යමටත් ඇතුලු ‌වෙයි

Exclusive15 hours ago

සමෘද්ධිලාභීන්ට 5000ක්: විශ්‍රාම සහ වැඩිහිටි දීමනා ‌ගෙදරටම: ආබාධිත අයටත් දීමනාවක්

Exclusive16 hours ago

තැපෑලෙන් ‌බෙහෙත් එවන්න බළකාය ලෑස්තියි

Exclusive18 hours ago

මෙන්න විශේෂ නිවේදනයක්: ‌කොරෝනා ගැන ‌වෛද්‍ය ජාසිංහ කියන ‌දේ විතරක් අහන්න

Exclusive19 hours ago

මරික්කාර් ‌හොරෙන්ම බෙදන්න පටන් අරන් (VIDEO & PHOTOS)

Exclusive7 months ago

මහේෂ්ට ජනපතිවරණයට ආරාධනාවක්

Exclusive7 months ago

සිකුරාදා රෑ කරන්න ගිය ‌මෛත්‍රිගේ අගමැති කුමන්ත්‍රණය කඩා වැටේ

Exclusive7 months ago

එජාප ඇමැතිලා 5ක් ඉවතට -අලුත් නම් 5ක් සූදානම්

Exclusive7 months ago

මහින්දගෙන් ‌ගෝඨාට නියෝගයක්

Exclusive5 months ago

පොතේ හැටියට දිනන්නේ කවුද? (උපුල් ‌ජෝශප් ප්‍රනාන්දුගේ ගුරුදා විග්‍රහය)

Exclusive1 week ago

රනිල්ගේ UNP එකයි සජිත්ගේ UNP එකයි

Exclusive3 months ago

සංගාගේ බිරිය ගැන අමුතු කතාවක් එළියට එයි

Exclusive6 months ago

මහරාජා අතින් ‌මේ මිනිසා ඉවර විය යුතුද? (උපුල් ‌ජෝශප් ප්‍රනාන්දුගේ ගුරුදා විග්‍රහය)

Gurudawa7 months ago

යූඑන්පී අපේක්ෂකයා ‌තෝරන්නේ ‌මෙහෙමෙයි… (උපුල් ‌ජෝෂප් ප්‍රනාන්දුගේ ගුරුදා විග්‍රහය)

Exclusive5 months ago

රණසිංහ ‌ප්‍රේමදාස නැගිටියි (උපුල් ‌‌ජෝශප් ප්‍රනාන්දුගේ ගුරුදා විග්‍රහය)